Энг таъсири кучли яҳудийлар рейтинги эълон қилинди

Жорий йил учун дунёнинг энг таъсири кучли 50 яҳудийси киритилган рейтинг эълон қилинди. Бу ҳақда “The Jerusalem Post” хабар берди.

Қайд этилишича, “50 Most Influential Jews” деб номланган рўйхатга сиёсат, бизнес, технология, ҳарбий соҳа, ОАВ ва бошқа йўналишларда катта таъсирга эга бўлган шахслар киритилган.

Рўйхатнинг биринчи ўрнидан Жаред Кушнер ва Иванка Трамп жой олган. Нашр уларни гаровга олинганларни уйига қайтариш борасидаги фаолияти билан ажратиб кўрсатган.

Иккинчи ўринни Исроил Бош вазири Биньяамин Нетаняху эгаллаган. Нашр унинг Исроил сиёсати ва мамлакат келажагига катта таъсир кўрсатаётганини қайд этган.

Учинчи поғонага Исроилнинг собиқ ҳарбий раҳбари ва сиёсатчиси Гади Эисенкот жойлаштирилган. Нашр уни Исроилнинг эҳтимолий бўлажак бош вазирларидан бири сифатида кўрсатган.

Рўйхатдаги таниқли шахслар қаторида Meta асосчиси Марк Цуcкерберг ва OpenAI раҳбари Сам Альтман ҳам бор. Улар 9-ўринни биргаликда эгаллаган. Нашр уларни сунъий интеллект ривожига ва жамият келажагига таъсир кўрсатаётган технология етакчилари сифатида таърифлаган.

Google ҳаммуассиси Сергей Брин 18-ўринга, Украина Президенти Владимир Зеленский эса 21-ўринга жойлаштирилган. Нашр Зеленскийни Россия босқинидан кейин Украинадаги қаршилик рамзига айланган сиёсатчи сифатида таърифлаган.

Шунингдек, рейтингдан Oracle асосчиси Ларри Эллисон, BlackRock раҳбари Ларри Финк, миллиардер инвестор Билл Аcкман ва Мексика Президенти Клаудия Шейнбаум каби таниқли шахслар ҳам ўрин олган.

Эслатиб ўтамиз, аввалроқ “Bloomberg” миллиардерлар рейтингида биринчи ўнликка фақат америкалик тадбиркорлар киргани ҳақида хабар берилган эди.