Энди Қозоғистон чегарасидан ўтиш учун кафолат пули талаб этилади

Қозоғистон ва Ўзбекистон ўртасидаги учта чегара ўтказиш пунктида электрон навбатни банд қилиш учун 9 ноябрдан бошлаб 86 500 тенге (тахминан 2 млн 261 минг сўм) кафолат пули талаб этилади. Бу ҳақда Туркистон вилояти Давлат даромадлари департаменти маълум қилди. 

Янги тартиб “Қозиғурт”, “Б. Қонисбаев” ва “Атамекен” чегара ўтказиш пунктларида амал қилади. Кафолат пули 20 ойлик ҳисоб-китоб кўрсаткичига тенг бўлиб, электрон навбатни банд қилишдан олдин ташувчининг махсус электрон ҳисобварағида ушбу маблағ бўлиши керак.

Белгиланган вақтда чегарага етиб келган ҳайдовчига кафолат пули тўлиқ қайтарилади. Бироқ юк машинаси белгиланган вақтда чегарага бормаса ва бу ҳолат 90 календарь кун ичида кетма-кет икки марта такрорланса, ташувчи маблағдан маҳрум бўлади. Пул Қозоғистон давлат бюджетига ўтказилади.

Департамент янги тартиб чегара ўтказиш пунктларида сунъий навбатлар юзага келишининг олдини олишга қаратилганини билдирган. Юк ташувчиларга қатновларни олдиндан режалаштириш ва электрон ҳисобварағида етарли маблағ бўлишини таъминлаш тавсия этилган.

Эслатиб ўтамиз, аввалроқ Қозоғистон хорижий фуқаролар учун мамлакатга киришга электрон рухсатнома олиш тартибини жорий этгани ҳақида хабар берилган эди.