Энди банклар кредит ундираётганда картани бўшатиб қўймайди

Ўзбекистон Марказий банки мижозларнинг розилигисиз кредит қарздорлигини сўндириш учун уларнинг банк карталаридан маблағларни ундиришга чеклов киритмоқда. Бу ҳақда Марказий банк кеча, 9 октябрь куни қабул қилган “Банк хизматлари истеъмолчилари билан ўзаро муносабатларни амалга оширишда тижорат банкларининг фаолиятига қўйиладиган минимал талаблар тўғрисидаги низомнинг 35-1-бандига қўшимча киритиш ҳақида”ги қарорда сўз боради.

Қарорга кўра, эндиликда тўловлар ундирилганидан кейин мижознинг ҳисобида меҳнатга ҳақ тўлашнинг энг кам миқдорининг камида ярмига тенг сумма қолиши керак. Янги қоида мижознинг рухсатисиз унинг барча банк карта ҳисобларидан кредит ёки кафиллик бўйича тўловларни ундиришга тааллуқли. 

Ҳозирда Ўзбекистонда меҳнатга ҳақ тўлашнинг энг кам миқдори 1 миллион 360 минг сўмни ташкил этади. Шу тариқа, маблағлар ундириб олинганидан сўнг мижознинг банк карталарида камида 680 минг сўм қолиши керак.

Ўзгартиришлар уч ойдан кейин – 2027 йил 10 январдан кучга киради.

Эслатиб ўтамиз, аввалроқ Ўзбекистонда банклар энди кредитнинг оқибатлари ҳақида олдиндан огоҳлантириши талаб этилиши ҳақида хабар берилган эди.