Эквадорда бир уйдан куйдирилган 7 нафар жасад топилди

Эквадорнинг жанубидаги Каньяр вилоятида жойлашган Ла-Тронкаль шаҳридаги уйдан куйдирилган 7 нафар жасад топилди. Ҳуқуқни муҳофаза қилувчи органлар ушбу қотилликни жиноий тўдалар ўртасидаги ҳудуд учун кураш билан боғламоқда. Бу ҳақда “CBS News” хабар берди.

Маълум қилинишича, жасадлар жорий йилнинг 29 июль куни қишлоқ ҳудудидаги хонадонлардан бирида топилган. Полиция маълумотларига кўра, қурбонларнинг икки нафари сим билан боғланган ҳолда бўлган. Уй ташқарисида эса ёниб кетган автомобиль топилган.

Қайд этилишича, ҳалок бўлганларнинг ёши 21–30 оралиғида бўлган. Терговчилар воқеа жиноий гуруҳлар ўртасидаги қарама-қаршилик натижаси бўлиши мумкинлигини билдирмоқда.

Ҳуқуқни муҳофаза қилувчи органлар уй деворларида “Бўрилар ҳудуди” ва “Бўрилар фаол” мазмунидаги ёзувлар қолдирилганини маълум қилган. Бу ёзувлар мамлакатдаги энг йирик жиноий тўдалардан бири “Los Lobos” (“Бўрилар”) билан боғлиқ бўлиши мумкин.

Мазкур гуруҳ гиёҳванд моддалар савдоси ва товламачилик билан шуғулланиши, шунингдек, Мексика ва Колумбия картеллари билан алоқадорлиги айтилмоқда.

Ўтган ой Эквадорнинг жануби-ғарбида ҳам пакетларга солинган 8 нафарнинг жасади топилган эди. Ўша воқеа жойида қолдирилган хатда қурбонлар “Los Lobos” жиноий тўдаси томонидан рақиб “Los Choneros” гуруҳига қарши кураш доирасида ўлдирилгани ҳақида маълумот бўлган.

Сўнгги йилларда Эквадор Жанубий Американинг нисбатан хавфсиз давлатларидан бири мақомидан кокаин транзити марказларидан бирига айланди. Мамлакатда жиноий тўдалар фаоллиги кескин кучайган бўлиб, 2025 йилда 9,2 мингдан ортиқ зўравонлик билан боғлиқ ўлим ҳолати қайд этилган. Ҳозирда мамлакатда уюшган жиноятчиликка қарши кенг кўламли ҳарбий операциялар давом этмоқда.

Эслатиб ўтамиз, аввалроқ Нигериянинг Кадуна штатида қуролли шахслар қишлоққа ҳужум қилиши оқибатида камида 30 киши ҳалок бўлгани ҳақида хабар берилган эди.