Дунёнинг энг хунук ити 5 минг доллар ютди (видео)

АҚШда “Дунёнинг энг хунук ити” танловининг 2025 йилги мавсуми бўлиб ўтди ва ғолиб итнинг эгасига 5 минг доллар мукофот берилди. Бу ҳақда “The New York Times” хабар берди.

Француз ва инглиз бульдогларининг аралашмасидан бўлган, жунсиз Петуния танловда ғолиб бўлган. 

Петуния танловга Орегон штатидан келган. У томошабин ва ҳакамларни ўзининг табиийлиги билан “маҳлиё қилган”. 

Ғолиблик учун Петуния 5 минг доллар олиши ҳамда NBC News телеканалининг “Today” кўрсатувида иштирок этиши кўзда тутилган. 

“Мазкур танловда жун йўқлиги, нотекис тишлар, хунук кўзлар – бу нуқсон эмас, балки шараф белгиларидир”, дейилади хабарда. 

Маълум қилинишича, ит илгари зотдор итлар билан шуғулланадиган одамнинг ҳовлисида яшаган, жарроҳлик амалиётига муҳтож бўлган, аммо нормал яшаш шароитига ҳам эга бўлмаган. Ит Luvable Dog Rescue бошпанаси ёрдамида янги уй топган ва зарур даволанишни олган.

Эслатиб ўтамиз, АҚШда “Дунёнинг энг хунук ити” танловининг 2024 йилги мавсумида ғолибликни Хитойнинг Пекин шаҳрида туғилган “Wild Thang” лақабли ит эгаллаганди. Ушбу ит танловда беш марта қатнашиб, уч марта иккинчи ўринни эгаллаган.