Дунёдаги энг йирик 16 та йўловчи самолётида ёриқлар аниқланди

“Emirates” ва “Qantas” авиакомпанияларига тегишли 16 та “Airbus A380” самолётининг қанот конструкциясида ёриқлар аниқланди. Ушбу лайнерлар парвозлардан вақтинча четлатилди. Бу ҳақда DW хабар берди.

Қайд этилишича, дунёдаги энг йирик йўловчи самолётларидан бири қанотининг муҳим элементида шикастланишлар аниқланганидан сабабли кенг кўламли текширувлар марказида қолган. Ёриқлар “Airbus A380” самолётларига режали техник хизмат кўрсатиш вақтида аниқланган. Шундан сўнг, 16 та самолёт қўшимча текширувдан ўтказиш учун вақтинча эксплуатациядан олиб ташланган.

ОАВ маълумотларига кўра, улардан 15 таси Дубайнинг “Emirates” авиакомпаниясига тегишли, яна биттасидан Австралиянинг “Qantas” компанияси фойдаланади. Инспекторларда энг кўп хавотир уйғотаётган “Emirates”нинг бешта самолётини текшириш ишлари 24 июнь куни бошланиши керак.

“Emirates” ва “Qantas”дан ташқари, “Airbus A380” самолётларидан “Lufthansa”, “British Airways”, “Etihad” ва “Qatar Airways” авиакомпаниялари ҳам фойдаланади. Шу билан бирга, ушбу турдаги лайнерларнинг энг йирик оператори бўлиб “Emirates” қолмоқда, унинг паркида бундай самолётлардан 100 дан ортиғи мавжуд”, дейилади хабарда.

“Airbus” компанияси янги буюртмалар йўқлиги сабабли 2021 йилда “A380” самолётларини ишлаб чиқаришни тўхтатган. Дастлаб икки палубали ушбу лайнер фуқаролик авиациясининг келажаги сифатида кўрилган, бироқ лойиҳа иқтисодий қийинчиликларга дуч келган.

Экспертларнинг билдиришича, тўртта двигателли ушбу самолётдан фойдаланиш фақат салон деярли тўлиқ банд бўлган тақдирдагина ўзини оқлайди. Ёқилғи сарфининг юқорилиги ва мос келувчи йўналишлар сони чеклангани сабабли, ушбу модель кенг оммалашмади.

Маълумот учун, ишлаб чиқариш даврида жами 251 та “Airbus A380” ҳаво кемаси эксплутация қилинган.