Доннаруммага пичоқ тирашган: Париждаги талончилик тафсилотлари очилди

“Манчестер Сити” ва Италия терма жамоаси дарвозабони Жанлуижи Доннаруммага Париждаги уйига босқин вақтида мис “кастет” билан калтакланган ва пичоқ билан таҳдид қилинган. Бу ҳақда “The Telegraph” нашри хабар берди.

2023 йилда содир бўлган воқеанинг тафсилотлари Париж жиноий ишлар бўйича судида ўтказилган мажлисда маълум бўлган.

2023 йил ёзида ўша вақтда “Пари Сен-Жермен”да ўйнаган Доннарумма ва унинг севгилиси, ҳозирда рафиқаси бўлган Алессия Элефанте Париждаги Монтен авенюсида жойлашган хонадонга босқинчилар кирганида уйғонган. Ўша пайтда Элефанте ҳомиладор бўлган.

Доннарумманинг кўрсатмаларига кўра, босқинчилар унинг юзига мис “кастет” билан урган ва пичоқ билан қўрқитган.

Элефантенинг айтишича, босқинчилар ундан сейф кодини талаб қилган. У эса кодни билмаслигини ва сейфнинг ўзи ҳам бўш эканини айтган.

“Улар мен ёлғон гапираяпман, деб ўйлаб, жаҳл қилишди. Сочларимдан тортишди ва улардан бири сонларимга урди. Мен уларга ҳомиладор эканимни айтдим, аммо улар тўхтамади”, дейди Элефанте.

Охир-оқибат Доннарумма сейф кодини берган, бироқ Элефанте айтганидек, сейф бўш бўлиб чиққан. Талончилик вақтида футболчидан қимматбаҳо соатлар, заргарлик буюмлари ва сумкалар, шунингдек, нақд пул ҳамда Mercedes ва Lamborghini автомобилларининг калитлари ўғирланган.

Полиция маълумотларига кўра, тўрт нафар босқинчи нарвон ёрдамида томга чиқиб, балконга тушган ва кейин деразаларни синдириб, хонадонга кирган.

Терговчилар талончиликни қамоқда бўлган Ильяс Хербуш ва Хиан Мамун ташкил қилган, деб ҳисобламоқда. Икки гумондор ҳам айбловларни рад этмоқда.

Босқинчилардан икки нафари ўша вақтда вояга етмаган бўлган. Вояга етмаганлар ишлари бўйича суд уларни уч ва тўрт йиллик қамоқ жазосига ҳукм қилган.

Яна бир гумондор 2024 йилда қамоқхонада ўз жонига қасд қилган. У жиноятга алоқадорлигини тан олган, аммо шерикларининг босими остида ҳаракат қилганини айтган.

Маълумот учун, Доннарумма 2025 йилда “Пари Сен-Жермен”ни тарк этган. Ҳозирда италиялик посбон Абдуқодир Ҳусанов тўп тепадиган “Манчестер Сити” футболчиси ҳисобланади.