“Диктатор” Мбаппе Мао Цзэдун ҳақидаги ҳазили учун узр сўради (видео)

Франция терма жамоаси сардори Килиан Мбаппе Мао Цзэдун ҳақидаги ҳазилидан сўнг Хитойда унга нисбатан бойкот эълон қилингани ва ушбу ҳазили ўйланмай айтилганини билдирди. У X (аввалги Twitter) ижтимоий тармоғида пост жойлаб, интервью вақтида айтган ҳазили учун кечирим сўради.

“Яқиндаги интервью давомида мен ўзимнинг тасвиримга муносабат билдирган эдим. Менинг изоҳим ўйланмай айтилган эди ва энди тушуниб етдимки, у Хитойдаги ҳамда бутун дунёдаги жуда кўп хитойликларнинг дилини оғритган.

Сўзларим туфайли хафа бўлган барчадан кечирим сўрайман. Мен мутлақо ёмон ниятда айтмаганман. Мен хитой халқини ва унинг тарихини чуқур ҳурмат қиламан ҳамда чин дилдан афсусдаман”, дейди у.

Қайд этиш жоиз, аввалроқ Килиан Мбаппе интервью давомида ўзининг севимли интернет-мемлари ҳақида гапириб берган. Бироқ унинг баъзи изоҳлари Хитойга нисбатан ҳақорат сифатида қабул қилинди.

Мбаппе ўзининг севимли меми – график таҳрирчи ёрдамида қайта ишланиб, “қайсидир хитойлик диктатор”нинг юзига жойлаштирилган ўз қиёфаси эканини айтган. Шундан сўнг футболчи баъзи Хитой компаниялари билан ҳамкорликдан маҳрум бўлган.

Бундан ташқари, Хитой телевидениеси Испания чемпионати ўйинларини ва Мбаппе иштирокидаги реклама материалларини намойиш этишдан бош тортди.

Маълумот учун, Мао Цзэдун (1893–1976) – Хитой Халқ Республикасининг асосчиси, давлат ва сиёсат арбоби ҳамда маоизм назариясининг муаллифидир. У 1949 йилда Хитой Коммунистик партиясини ғалабага етаклаб, ХХР ташкил топганини эълон қилган ва умрининг охиригача мамлакатни бошқарган. Унинг раҳбарлиги остида Хитойда йирик ижтимоий ва иқтисодий ислоҳотлар, жумладан, “Катта сакраш” ҳамда “Маданий инқилоб” ташаббуслари амалга оширилган бўлиб, бу жараёнлар мамлакат сиёсий ва ижтимоий ҳаётига чуқур ва зиддиятли таъсир кўрсатган. Ҳозирги кунда Мао Цзэдун замонавий Хитой давлатчилигининг асосчиси сифатида мамлакат тарихида муҳим ва эътиборли ўрин эгаллайди.