Диққат! Ўзбекистонда ўта хавфли юқумли касаллик тарқатувчи “уйғонди”

Ўта хавфли юқумли касаллик тарқатувчи Қрим-Конго геморрагик иситма касаллиги уйғонгани айтилди. Бу ҳақда Санитария-эпидемиология қўмитаси хабар берди.

Қайд этилишича, ушбу касаллик каналар чақиши оқибатида юзага келади ва бу инсон ҳаёти учун ниҳоятда хавфлидир. Санэпидқўмита вакилининг сўзларига кўра, касалликни юқтириб олмаслик учун бир нечта қоидаларга амал қилиш керак бўлади. Хусусан, чорва молларининг танасига ёпишиб олган каналарни уларнинг терисидан олиб ташлаш учун қўл билан ушламаслик, уларни ўлдирмаслик лозим.

Шунингдек, агар чорва молларида каналар мавжуд бўлса, ҳудудий ветеринария бўлимларига мурожаат қилиб, каналардан тозалаш чораларини кўриш шарт. Мабодо тоғ-адирларга чиққан вақтда кана чақса, дарҳол тиббиёт ходимларининг кўригидан ўтиш талаб қилинади.

Ушбу касалликни юқтирганларни даволаш жараёнида шифокорлар махсус ҳимоя кийимларидан фойдаланиши ҳамда ўзига юқтириб олмаслик учун эҳтиёткорлик билан ҳаракат қилиши лозим.

Эслатиб ўтамиз, аввалроқ Қозоғистоннинг Қостанай вилояти Аулиекўл тумани Новоселовка қишлоғида бруцеллёз касаллиги тарқалгани сабабли карантин чоралари жорий этилганди.