Дембеле ПСЖда юбилей учрашувини ўтказди

Кеча, 21 октябрь куни Усмон Дембеле узоқ танаффусдан сўнг ПСЖнинг “Байер Леверкузен” га қарши учрашувида майдонга тушди ва жамоасининг 6-голига муаллифлик қилди. Ушбу ўйин Дембеленинг ПСЖ сафидаги 100-учрашуви бўлди. Бу ҳақда “L’Équipe” нашри хабар берди.

Бу учрашув Дембеле учун рамзий аҳамиятга эга бўлди. Усмон ПСЖ сафида 100 та ўйинда 44 та гол уриб, 32 та голли узатма амалга оширди. Ўтган мавсум футболчи учун энг сермаҳсул бўлиб, у 53 ўйинда 35 та гол ва 16 та ассист билан “Олтин тўп” совринини қўлга киритган эди.

“Мухлисларимизнинг ўз жамоасидан завқ олаётгани кўриш жуда ёқимли. Усмоннинг майдонга қайтиб, жамоасининг голли ҳужумларида иштирок этаётганини кўриш эса янада қувончли. Бу биз учун завқ бағишлайди”, деди ПСЖ бош мураббийи Луис Энрике.

Клуб президенти Носир Ал-Хелайфи ўйин сўнгида кийим алмаштириш хонасига кириб, футболчиларни табриклади ва Дембелега ПСЖ сафида 100-ўйин ўтказгани муносабати билан махсус соврин топширди.

“Жароҳат олган пайтингизда, албатта, тезроқ майдонга қайтишни хоҳлайсиз. Аммо мен шошилмадим тўлиқ тикланиш учун вақт олдим. Ҳозир ҳам ҳали энг яхши ҳолатимда эмасман, бироқ клуб сафида 100-учрашувимни Чемпионлар лигасидаги гол билан нишонлаганимдан жуда хурсандман. Энди шу суръатни давом эттиришни истайман”, дейди Дембеле.

Маълумот учун, Дембеле сўнгги бор жорий йилнинг 30 август куни “Тулуза”га қарши Лига 1 учрашувида майдонга тушган эди. Шундан кейин мушаклардаги муаммолар сабабли у деярли икки ой ўйинлардан ўтказиб юборди.