Чемпион, табриклайман – Клозе Мессини рекорд билан қутлади

Германия терма жамоасининг собиқ ҳужумчиси Мирослав Клозе Аргентина терма жамоаси етакчиси Лионель Мессининг Жаҳон чемпионатларидаги голлари сони бўйича рекорд ўрнатганидан ҳайратда эмаслигини маълум қилди. У бу ҳақда Германиянинг “Süddeutsche Zeitung” нашрига берган интервьюсида айтди. 

Аввалроқ, Месси Клозени ортда қолдириб, Жаҳон чемпионатлари тарихидаги энг яхши тўпурарлар рўйхатида якка пешқадамга айлангани ҳақида хабар берган эди.

“Мен ҳар доим Месси ҳақида юқори фикрда бўлганман. Мен учун у барча даврларнинг энг яхши футболчиси. Чемпион, табриклайман”, дейди Клозе.

Эслатиб ўтамиз, Месси биринчи турда Жазоирга қарши баҳсда (3:0) хет-трик қайд этган эди. Австрияга қарши учрашувдаги ғалаба билан Аргентина терма жамоаси муддатдан аввал плей-офф босқичига йўлланма олди.

Маълумот учун, Месси Аргентина терма жамоаси билан 2022 йилда жаҳон чемпиони бўлган, 2014 йилги мундиал финалида иштирок этган. Шунингдек, у 2008 йилги Олимпия ўйинлари чемпиони ҳамда икки карра Америка кубоги ғолиби (2021, 2024) ҳисобланади. Унинг ҳисобида рекорд даражадаги саккизта “Олтин тўп” мукофоти ҳам мавжуд.