“Челси” 150 минг фунт стерлинг жаримага тортилди

Англия футбол ассоциацияси (ФА) Лондоннинг “Челси” клубини Англия Премьер-лигаси 18-туридан ўрин олган “Астон Вилла”га қарши учрашувидан кейин клуб ходимининг ноўрин хатти-ҳаракати учун 150 минг фунт стерлинг миқдорида жаримага тортди. Бу ҳақда ФА расмий сайтида маълум қилинди.

2025 йилнинг декабрь ойи охирида Лондонда бўлиб ўтган 18-тур учрашуви меҳмонларнинг 2:1 ҳисобидаги ғалабаси билан якунланганди. Маълум бўлишича, финал ҳуштаги чалиниши биланоқ “Челси” ходими “Астон Вилла”нинг техник майдонига пластик шиша улоқтирган.

ФА “аристократлар”га ушбу воқеа акс этган видеоёзувни юбориб, айбдор шахсни аниқлашни талаб қилган. Бироқ на клуб, на ассоциацияси қоидабузарни содир этган шахсни аниқлай олган. Шунга қарамай, “Челси” содир бўлган ҳолат бўйича жавобгарликни тан олган.

“Челси” ўз футболчилари ёки техник зонадаги тегишли ходимларни финал ҳуштагидан кейин ноўрин, провокацион ёки тажовузкор ҳаракатлар қилмаслигини таъминлай олмади. Шу сабаб ташкилот клубга 150 минг фунт стерлинг миқдорида жарима солди”, дейилади ФА баёнотида.

Маълумот учун, “Челси” ҳозирда Премьер-лига турнир жадвалида 34 очко билан 6-ўринда бормоқда.