Буркина-Фасо Франция билан дипломатик алоқаларни узди

Буркина-Фасо Франция билан дипломатик алоқаларни узмоқда. Бу ҳақда Африка давлати ҳукуматининг баёнотига таяниб, “Burkina24” хабар берди.

Ҳукумат раҳбари Пингдвенде Жильбер Уэдраогонинг баёнотида айтилишича, ушбу қарор икки томонлама муносабатларни “синчиклаб баҳолаш” натижасида қабул қилинган, чунки ўзаро ҳурмат ва миллий суверенитет учун шароит узоқ вақт давомида таъминланмаган. У Франциянинг Буркина-Фасо миллий манфаатларига қарши қаратилган “тинимсиз фаолияти” ва унинг “неоколониал амбициялари”ни қоралаган.

“Мамлакатимиз устидан ҳукмронлик қилиш ва халқимизни қулликка солишга қаратилган империалистик интилишлар фонида биз масъулият ва суверенитет фойдасига танлов қилдик. Ҳукумат шуни алоҳида таъкидлайдики, ушбу қарор Буркина-Фасо ва Франция халқларини бирлаштириб турувчи тарихий, инсоний, маданий ва ижтимоий алоқаларни ҳеч қайси жиҳатдан шубҳа остига қўймайди”, дейилади коммюникеда.

Маълумот учун, Буркина-Фасода 2022 йилда иккита давлат тўнтариши юз берган. Мамлакат раҳбари Иброҳим Траоре “ўтиш даври президенти” унвонига эга. 2022 йилнинг январь ойида у сайланган президент Рок Каборени ағдарган “Ҳимоя ва тикланиш йўлидаги ватанпарварлик ҳаракати” ҳарбийларининг ҳокимият тепасига келишига ёрдам берган, сентябрда эса Траоре иккинчи тўнтаришда иштирок этиб, унинг якунларига кўра мамлакатни бошқара бошлаган.

Франция билан дипломатик муносабатлар узилгани ҳақидаги баёнотга қарамай, Буркина-Фасо ҳукумати барча давлатлар билан суверен тенглик шартлари асосида мулоқот қилишга тайёр эканлигини маълум қилган.

2024 йилнинг апрель ойида Буркина-Фасо расмийлари уч нафар француз дипломатини “путур етказувчи фаолият”да айблаб, мамлакатдан чиқариб юборишга қарор қилган эди. Бундан ташқари, ушбу дипломатлар “персона нон грата” деб эълон қилинган. Бир йил аввал эса Франция Ташқи ишлар вазирлиги ушбу Африка давлатига бериладиган барча молиявий ёрдамларни тўхтатишини эълон қилган.