Буэнос-Айресда минглаб мухлислар Аргентинанинг финалга чиққанини нишонлади

Аргентина терма жамоасининг Жаҳон чемпионати ярим финалида Англия устидан қозонган 2:1 ҳисобидаги ғалабасидан сўнг, минглаб мухлислар Буэнос-Айрес марказига йиғилиб, жамоанинг финалга чиққанини кенг нишонлади. Бу ҳақда “Primera Hora” хабар берди.

Аргентина пойтахтининг бош рамзларидан бири ҳисобланган Обелиск атрофида катта оломон тўпланди. Шу муносабат билан ёдгорлик мамлакат давлат байроғи рангларида ёритилди. Мухлислар Авенида Нуэве-де-Хулио шоҳкўчасини тўлиқ эгаллаб, қўшиқлар куйлашди, рақсга тушишди ва миллий байроқларни баланд кўтаришди.

Айрим мухлислар автобус бекатлари ва ёритиш устунларига чиқиб олган бўлса-да, навбатчилик қилаётган полиция байрам тадбирларига аралашмаган.

Шаҳарнинг бошқа ҳудудларида ҳам байрамона муҳит ҳукм сурди. Мухлислар орасида 1982 йилда Аргентина ва Буюк Британия ўртасидаги қуролли можарога сабаб бўлган баҳсли Фолкленд (Аргентинада Мальвина деб аталади) ороллари акс эттирилган байроқлар ҳам кўтарилди.

Мазкур ҳудудий низо туфайли Англия ва Аргентина ўртасидаги ярим финал учрашуви Аргентина жамоатчилиги учун нафақат спорт, балки рамзий аҳамиятга ҳам эга бўлди.

Эслатиб ўтамиз, Аргентина ярим финалда Англияни 2:1 ҳисобида мағлуб этиб, Жаҳон чемпионати финалига йўл олди. Энди улар жорий йилнинг 19 июль куни бўлиб ўтадиган ҳал қилувчи баҳсда Испания терма жамоасига қарши майдонга тушади.