Аргентина кетма-кет иккинчи марта Жаҳон чемпионати финалига чиқди

Бугун, 16 июль куни 2026 йилги Жаҳон чемпионати ярим финалида Аргентина Англияни 2:1 ҳисобида мағлуб этиб, кетма-кет иккинчи марта финалга йўл олди.

Ҳисобни 55-дақиқада Англия ҳужумчиси Энтони Гордон очди. Аргентина 85-дақиқада Энсо Фернандеснинг голи эвазига мувозанатни тиклади. Учрашувга қўшиб берилган вақтнинг иккинчи дақиқасида эса Лаутаро Мартинес ҳал қилувчи голни киритиб, жанубий америкаликларга финал йўлланмасини тақдим этди. Шу тариқа аргентиналиклар кетма кет иккинчи ўз тарихида эса 7-марта финалга чиқди.

Эндиликда жорий йилнинг 19 июль куни бўлиб ўтадиган финалда Аргентина ярим финалда Францияни 2:0 ҳисобида мағлуб этган Испанияга қарши майдонга тушади.

Бу Аргентина терма жамоасининг Жаҳон чемпионатлари тарихидаги еттинчи финали бўлади. Шу тариқа, жанубий америкаликлар ушбу кўрсаткич бўйича Италияни ортда қолдириб, Бразилия билан тенглашди. Бу борада фақат Германия кўпроқ саккиз марта мундиаль финалида иштирок этган.

Қайд этиш жоиз, Аргентина ўз тарихида Жаҳон чемпионатлари ярим финалида ҳеч қачон мағлуб бўлмаган. Жамоа иштирок этган олти ярим финалнинг барчасида ғалаба қозонган.

Англия терма жамоаси эса ўз тарихида тўртинчи марта Жаҳон чемпионати ярим финалига чиқди. Англияликлар 1966 йилда чемпионликни қўлга киритган, 1990 ва 2018 йилги мундиалларда эса тўртинчи ўринни эгаллаган.

Қизиқарли жиҳати, Испания ва Аргентина мос равишда амалдаги Европа чемпионати ҳамда Копа Америка ғолиблари ҳисобланади. Жамоалар жорий йилнинг март ойида Финалиссима баҳсида ўзаро тўқнаш келиши керак эди. Бироқ Яқин Шарқдаги хавфсизлик билан боғлиқ вазият сабабли учрашув бекор қилинган. Баҳс дастлаб Қатарда ўтказилиши режалаштирилган эди.