Британия шаҳзодаси Гарри илк бор Киевга борди

Британия шаҳзодаси Гарри бугун, 12 сентябрь куни эрталаб Украина ҳукумати таклифига биноан эълон қилинмаган ташриф билан Киевга борди.

Сассекс герцоги уруш пайтида яраланган аскарларни тиклашга ёрдам бериш ниятида. Унинг сўзларига кўра, уни Киевга “Superhumans” реабилитация маркази раҳбари Ольга Руднева таклиф қилган, у апрель ойида Львовда танишган.

“Тахминан икки ой олдин мен тасодифан АҚШда Руднева билан учрашиб қолдим ва қандай ёрдам беришимни сўрадим. У мени келишга таклиф қилди”, дейди Гарри.

Superhumans тиббиёт маркази Львов вилоятида 2023 йилнинг баҳорида очилган. Муассаса протезлаш, реконструктив жарроҳлик, травмадан кейинги стрессни даволаш, урушдан жабрланган Украина ҳарбийлари ва фуқароларини реабилитация қилишга ихтисослашган. Лойиҳа хусусий хайрия ва халқаро ёрдам ҳисобидан молиялаштирилади.

Бу герцогнинг Украина пойтахтига биринчи ташрифи.

“Львовда урушни деярли кўрмайсиз. Бу жуда узоқ ғарбда. Уруш келтирган ҳақиқий вайронагарчиликни биринчи марта кўрамиз”, дейди шаҳзода.

Шаҳзода Гарри Украинанинг Иккинчи жаҳон уруши тарихи музейига ташриф буюриши, фахрийлар билан учрашиши ва Бош вазир Юлия Свириденко билан музокаралар ўтказиши кутилмоқда.

Гарри ва унинг рафиқаси Меган Маркл 2020 йилда қироллик лавозимини тарк этиб, Буюк Британиядан Калифорнияга кўчиб ўтди, аммо у хайрия ишларида фаол бўлишда давом этмоқда. Шаҳзода Гарри ташаббуси билан 2014 йилдан буён имконияти чекланган ҳарбий хизматчилар ўртасида Invictus Games халқаро спорт мусобақаси ўтказиб келинмоқда. Invictus Games фонди ҳарбий хизматчиларни реабилитация қилиш учун спорт анжомлари билан таъминлаш орқали Украинага ёрдам беради.