Бразилияда Лула да Силва тўртинчи марта мамлакат Президенти этиб сайланди

Бразилиянинг амалдаги Президенти Луис Инасиу Лула да Силва президентлик сайловларининг иккинчи босқичида ғалаба қозониб, тўртинчи марта давлат раҳбари этиб сайланди. У собиқ президент Жаир Болсонаронинг ўғли, сенатор Флавио Болсонарони 4 миллиондан ортиқ овоз фарқи билан мағлуб этди. Бу ҳақда мамлакат сайлов комиссияси маълум қилди.

Қайд этилишича, сайловнинг биринчи босқичида Флавио Болсонаро кўпроқ овоз тўплаган бўлса-да, иккинчи босқичда мағлуб бўлган. У, шунингдек, сайлов натижаларини бекор қилишни сўрашини билдирган. Бунга Олий суднинг овоз бериш вақтини икки соатга узайтириш ҳақидаги қарорини сабаб қилиб кўрсатган. Бироқ таҳлилчилар бу талаб қаноатлантирилиши эҳтимоли пастлигини айтмоқда.

80 ёшли Лула да Силва 2003–2011-йилларда ҳам Бразилия президенти бўлган. 2018 йилда коррупция айбловлари билан қамоққа олинган, бироқ кейинчалик унга чиқарилган ҳукмлар бекор қилинган. У 2022 йилги сайловда Жаир Болсонарони мағлуб этиб, президентликка қайтган эди.

Сайловолди кампанияси давомида Лула қашшоқлик ва тенгсизликни камайтириш, кам таъминланган аҳолини қўллаб-қувватлашга қаратилган сиёсатини давом эттиришга ваъда берган. Шунингдек, у рақиби ғалаба қозонган тақдирда ижтимоий ёрдам харажатлари қисқариши мумкинлигини билдирган.

Маълум қилинишича, Лула да Силванинг янги президентлик муддати осон кечмаслиги мумкин. Мамлакатда сайланган янги Конгресс сўнгги ўн йилликлардаги энг консерватив таркибга эга бўлган. Бу президентнинг муҳим қонунларни қабул қилиш ва бюджет масалаларида қарорлар чиқаришини қийинлаштириши мумкин.

Бразилия Конститутсиясига кўра, бир шахс кетма-кет кўпи билан икки муддат президент этиб сайланиши мумкин. Президент тўрт йил муддатга сайланади. Давлат раҳбари умумхалқ овоз бериш йўли билан сайланади. Агар биринчи босқичда номзодлардан ҳеч бири ҳақиқий овозларнинг ярмидан кўпини ололмаса, энг кўп овоз тўплаган икки номзод иштирокида иккинчи босқич ўтказилади. Бразилия Конституциясининг 14-моддаси 5-бандига кўра, президент фақат бир марта кетма-кет қайта сайланиши мумкин. Яъни икки муддатдан кейин яна президентликка сайланиш учун танаффус бўлиши керак.

Шунинг учун Лула да Силванинг тўртинчи марта президент этиб сайланиши қонунга зид эмас. Бироқ 2026 йилдаги ғалабасидан кейин у 2030 йилги сайловда яна кетма-кет президентликка номзодини қўя олмайди.