Бортида минглаб автомобиллар бўлган кема Тинч океанига ғарқ бўлди

Жорий йилнинг 23 июнь куни Тинч океанида уч ҳафта давомида ёнган Morning Midas кемаси минглаб автомобиллар билан бирга чўкиб кетди. Бу ҳақда “Bloomberg” хабар берди.

Маълумотларга кўра, июнь бошида ёниб кетган Morning Midas кемаси Тинч океанининг ўртасида, қирғоқдан тахминан 579 километр узоқликда ташлаб кетилган.

Кемани бошқарувчи Zodiac Maritime компаниясининг баёнотига кўра, ёнғин оқибатидаги шикастланишлар об-ҳаво ёмонлашуви билан янада кучайган, оқибатда кема 23 июнь куни бутунлай чўкиб кетган.

Morning Midas кемасига ёрдам кўрсатиши керак бўлган учта махсус кемадан иккинчиси 15 июнь куни, ёнғин бошланганидан бир ҳафтадан кўпроқ вақт ўтибгина воқеа жойига етиб борган.

Кема Хитойнинг Chery Automobile Co. ва Great Wall Motor Co. каби автомобиль ишлаб чиқарувчиларнинг машиналарини Мексикага олиб кетаётган бўлган. Умумий ҳисобда кемада қарийб 3 мингта автомобиль, жумладан 800 та электромобиль бўлган.

Эслатиб ўтамиз, аввалроқ Мьянма соҳиллари яқинида 2 та кемада 400 дан ортиқ роҳинжа мусулмонлари чўкиб кетган эди. Кемаларда бўлган роҳинжаликлар Бангладешдаги улкан Cox’s Bazar қочқинлар лагерларидан ёки Мьянманинг ғарбий Рахайн штатидан қочаётган бўлган.