Биз тинчлик режасини “мегафон режимида” муҳокама қилмаймиз – Песков

АҚШнинг Украина бўйича тинчлик режаси Кремль томонидан “баланд овозда” баёнотлар орқали муҳокама қилинмайди. Бу ҳақда бугун, 21 ноябрь куни Россия Президенти матбуот котиби Дмитрий Песков журналистлар билан суҳбатда сўз очди.

“Сиз шундай мураккаб масалани “мегафон режимида” муҳокама қилишимизни хоҳлайсизми? Биз тинчлик музокараларига, жараённинг ўзи учун эмас, муваффақиятли бўлиши учун очиқмиз ва биз ҳақиқатан ҳам бу музокаралар муваффақият билан якунланишини хоҳлаймиз. Ана шу сабабдан биз буни мегафон режимида муҳокама қилишга тайёр эмасмиз”, дейди у.

Песковнинг айтишича, АҚШ режаси ҳали расман қабул қилинмаган.

“Биз унинг турли модификациялари мавжудлиги ҳақида биламиз, лекин расман ҳеч нарса олганимиз йўқ, айрим маълумотларни матбуотдан билиб оляпмиз. Ҳозирча ҳеч нарса амалда муҳокама қилинмаяпти. Биз диалогга очиқмиз”, дейди у.

Қайд этиш жоиз, гап АҚШнинг 28 банддан иборат тинчлик режасига ҳақида кетмоқда. Бу ҳужжатни Украина Радаси депутати Алексей Гончаренко, шунингдек, “Axios” ва “Financial Times” эълон қилди. АҚШ Президенти Дональд Трамп ушбу режани қўллаб-қувватлаган.

Гончаренко эълон қилган ҳужжатга кўра, режа Қрим, Луганск ва Донецкни де-факто Россия ҳудуди сифатида тан олиш, Украинанинг НАТОга киришдан конституциявий тарзда воз кечиши, Украина Қуролли кучлари сонини чеклаш ва Россияга нисбатан санкцияларни босқичма-босқич бекор қилиш каби бандларни ўз ичига олади.

Эслатиб ўтамиз, аввалроқ Украина Президенти Владимир Зеленский мамлакат ҳозир қийин танлов олдида турганини айтиб, халқига мурожаат йўллаган эди. Унинг бу мурожаати Вашингтоннинг жорий йил 27 ноябрь кунига қадар можарони ҳал қилиш бўйича келишув лойиҳаси имзоланмаса, Қўшма Штатлар Украинага қурол-яроғ етказиб бериш ва разведка маълумотлари алмашишни тўхтатиши билан таҳдид қилгани фонида йўлланмоқда.