“Украина жуда қийин танлов олдида турибди”. Зеленский халқига мурожаат билан чиқди (видео)

Украина Президенти Владимир Зеленский мамлакат ҳозир қийин танлов олдида турганини айтиб, халқига мурожаат йўллади. У ўз видеомурожаатини Telegram саҳифасига жойлади.

Унинг бу мурожаати Вашингтоннинг жорий йил 27 ноябрь кунига қадар можарони ҳал қилиш бўйича келишув лойиҳаси имзоланмаса, Қўшма Штатлар Украинага қурол-яроғ етказиб бериш ва разведка маълумотлари алмашишни тўхтатиши билан таҳдид қилгани фонида йўлланмоқда.

“Биз ҳозир тарихимизнинг энг оғир дамларидан бирида турибмиз. Украина жуда қийин танлов олдида турибди: ё ўз қадр-қимматини йўқотиш ёки асосий ҳамкорини йўқотиш хавфи. Ё қийин 28 банддан иборат тинчлик режаси ёки қаҳратон қиш. Биздан аллақачон икки марта ҳужум қилганларга ишонишни сўрашмоқда ва улар жавоб кутишяпти. Биз АҚШ ва ҳамкорларимиз билан хотиржам, лекин тез ишлаймиз ва душманга Украина тинчликни хоҳламайди, дейишга асос бермаймиз. Мен тинчлик режасида икки жиҳат: украиналикларнинг қадр-қиммати ва эркинлигини ҳисобга олиши учун курашаман. Биз урушни тугатиш учун ҳамма нарсани қиламиз, лекин Украина, Европа ва глобал тинчликка барҳам бериш учун эмас.

Биз деярли тўрт йилдан бери дунёдаги энг катта армиялардан бирини ушлаб турдик. Халқимиз уруш тугашини хоҳлайди. Биз пўлатдек мустаҳкаммиз, лекин энг кучли металл ҳам синиши мумкин. Урушнинг биринчи куни қочмадик. Бу қадр-қиммат. Бу эркинлик. Россия учун энг даҳшатли нарса – украиналикларнинг бирлиги. Энди бизга муносиб тинчлик ҳар қачонгидан ҳам керак. Одамлар, фуқаролар, сиёсатчилар – биз бирлашишимиз, жанжал ва сиёсий ўйинларни тўхтатишимиз керак. Ортимда Украина халқи турганини билиб, муносиб тинчликка эришиш менга осонроқ бўлади.

Кейинги ҳафта қийин бўлади. Бизни ажратиш учун жуда кўп босим бўлади. Душман ҳеч нарсага эриша олмаслигимиз учун ҳамма нарсани қилади. Уларга бундай қилишга рухсат беришга ҳаққимиз йўқ. Биз тинчлигимиз, қадр-қимматимиз ва эркинлигимиз учун бирлашишимиз керак. Мен ёлғиз эмаслигимга ишонаман”, деган у.

АҚШ Президенти Дональд Трампнинг Украинадаги можарони ҳал қилиш режаси 28 банддан иборат. Ҳужжатда Украинанинг хавфсизлик ва сиёсий мақоми, ҳарбий ва ҳудудий келишувлар, иқтисодий, гуманитар ва энергетика масалалари кўриб чиқилади.

Хусусан, Украинанинг хавфсизлиги ва сиёсий мақоми тўғрисидаги келишувда унинг суверенитетини тасдиқлаш, АҚШдан шартли хавфсизлик кафолатлари, мамлакатнинг НАТОга аъзо бўлишдан бош тортиши конституциявий белгилаб қўйилиши, Украина Қуролли кучлари сонини чеклаш ва унинг ядросиз мақомини сақлаб қолиш назарда тутилган. НАТО, ўз навбатида, мамлакатни блокка қабул қилмаслигини тасдиқлайди.