Бир фуқарога бериладиган банк карталари сонига чеклов киритилди

Аввалроқ, Ўзбекистон Марказий банки мамлакатда битта жисмоний шахсга бериладиган банк карталари сонини битта банкда 5 тагача, барча банкларда 20 тагача белгилаш масаласи кўриб чиқилаётгани ҳақида хабар берган эди. QALAMPIR.UZ манбасининг билдиришича, ушбу тартиб жорий йилнинг 1 январидан кучга кирган.

Унга кўра, банклар томонидан бир жисмоний шахсга карталар сонини битта банкда 5 тагача, барча банкларда 20 тагача эмиссия қилиш мумкин бўлади.

Бунда виртуал ва кобейджинг карталари ҳам инобатга олинади.

Марказий банк бундай амалиёт карталар билан боғлиқ шубҳали (фрод) операцияларнинг олдини олиш, фирибгарлик схемаларида жисмоний шахсларга тегишли ҳисобварақлар ва банк карталари иштирокини камайтириш мақсадида йўлга қўйилаётганини маълум қилганди.

Бунда ушбу талаб чет эл валютасида очилган банк карталарига нисбатан татбиқ этилмаслиги кўзда тутилган.

Билдирилишича, бугунги кунда банк карталарига эга жисмоний шахсларнинг қарийб 97 фоизида (22 млн та) 5 тагача, 3 фоиз (770 мингта) жисмоний шахсда 5-20 гача ҳамда 0,03 фоизда ёки 7 мингта жисмоний шахсда 20 тадан ошиқ карталар расмийлаштирилган.

Жисмоний шахслар номига кўп миқдорда очилган банк карталарини таҳлил қилиш жараёнида, ушбу банк карталарининг бир қисмидан (аксарият ҳолатларда карта эгасининг хабари йўқ) фирибгарлик мақсадларида фойдаланилаётгани аниқланган.