Бемор аёлга шилқимлик қилган тиббиёт ходими 5 суткага қамалди

Қашқадарё вилоятининг Деҳқонобод туманида 49 ёшли тиббиёт ходими уни укол қилиш учун уйига чақирган аёлга шаҳвоний шилқимлик қилди ва қилмиши учун 5 суткага маъмурий қамоққа олинди. QALAMPIR.UZ суд ҳужжати билан танишди.

Маълум қилинишича, воқеа жорий йилнинг 24 сентябрь куни соат тахминан 09:00 да содир бўлган. Тумандаги оилавий шифокорлик пунктларидан бирида патронаж ходими бўлиб ишловчи эркак чақирув асосида укол қилиш учун аёлнинг уйига борган.

Муолажадан сўнг, аёл ташқарига чиқаётганида, эркак унинг юзидан ушлаб, уйда ҳеч ким йўқлигини айтиб, жинсий алоқа қилишни таклиф этган. Аёл эса уни итариб юбориб, ташқарига чиқиб кетган.

Судда эркак ўз айбига иқрор бўлмаган. У аёлнинг тиши оғригани сабабли укол қилиш учун борганини, муолажадан кейин унга Ғузор ёки Деҳқонобод тумани марказига бориб, шифокорга кўринишни тавсия қилгани ва уйига қайтганини билдирган.

Суд қарорига кўра, эркак Маъмурий жавобгарлик тўғрисидаги кодекснинг 41-1-моддаси (шаҳвоний шилқимлик қилиш) 1-қисмида назарда тутилган шаҳвоний шилқимлик қилиш ҳуқуқбузарлигини содир этганликда айбли деб топилган. Унга 5 сутка маъмурий қамоқ жазоси тайинланган.

Эслатиб утамиз, аввалроқ Сирдарё вилоятининг Оқолтин туманида эркак йўл бўйида савдо қилаётган аёлга нисбатан шаҳвоний шилқимлик қилгани ҳақида хабар берилган эди.

Маржона Маманиёзова