Байден тарихга ўзини террорчи сифатида ёзди – Володин

АҚШ Президенти Жо Байден ўзини тарихга террорчи сифатида ёзди. Бу ҳақда 9 февраль куни Россия Федерацияси Давлат думаси раиси Вячеслав Володин ўзининг Telegram-каналида ёзди. 

АҚШ Президенти Конгрессда сўзлаган нутқида Америка халқи дунё учун йўл кўрсатувчи нур бўлиб хизмат қилишини айтди, деб эслади Володин.  

“Бу Учинчи Рейх раҳбарларининг баёнотларини эслатади. Бу эксклюзивлик мафкураси нимага олиб келишини бугун Пулицер мукофоти совриндори Сеймур Херш томонидан Байденнинг “Шимолий оқим”га путур етказишга алоқадорлиги ҳақидаги тергов натижаларини ўқиш орқали кўриш мумкин”, дейди Россия Давлат Думаси раиси. 

Володиннинг таъкидлашича, АҚШ Президентининг кўрсатмаси билан америкалик ғаввослар НАТО машғулотлари ниқоби остида ва Норвегия ҳарбий-денгиз кучлари кўмагида Болтиқ денгизидаги газ қувурлари яқинига масофадан бошқариладиган портловчи мосламаларни ўрнатган, кейин эса уларни ишга туширган.  

“Агар Трумен Хиросима ва Нагасакида тинч аҳолига қарши атом қуролини қўллаган жиноятчига айланган бўлса, Байден ўзининг стратегик ҳамкорлари: Германия, Франция, Голландиянинг энергетика инфратузилмасини йўқ қилишга буйруқ берган террорчига айланди”, деб таъкидлади у. 

Володиннинг сўзларига кўра, бу ўз фуқаролари манфаатларидан келиб чиқиб, иқтисодиётни ривожлантиришга қарор қилган вассалларини қўрқитиш ҳаракати эди. 

Эълон қилинган фактлар халқаро тергов, Байден ва унинг шерикларини жавобгарликка тортиш, шунингдек, терактдан жабрланган мамлакатларга товон тўлаш учун асос бўлиши керак, дея қўшимча қилди у.