Байден қандай касалликларга чалингани очиқланди

Кеча, 28 февраль куни АҚШ Президенти Жо Байден қатор касалликлардан азият чекиши маълум бўлди. Бу ҳақдаги тегишли ҳужжат Оқ уй томонидан эълон қилинди.

Тиббий ҳужжатда қайд этилишича, Америка Президентига "Обструктив уйқу апноэ синдроми" яъни тунги дам олиш вақтида нафас олишнинг кескин камайиши ёки тўлиқ тўхташи билан боғлиқ кенг тарқалган патология ташхиси қўйилган бўлиб, у хотира бузилишига, ишлашнинг пасайишига ва интеллектнинг ёмонлашишига олиб келиши мумкин. 

Бундан ташқари, Байденда умуртқа артрит, гиперлипидемия ва ошқозон-ичак тракти, гастроэзофагиал рефлюкс касалликлари борлиги аниқланган.

"Беморда лентиго ва актиник ўзгаришлар ( терида бир нечта жойларда доғлар пайдо бўлиши) мавжуд", дейилади тиббий хулосада.

Шунингдек, бош мия нервлари ва вестибуляр функцияси нормал экани, тремор (қалтираш), сианоз (кўкариш) ва шишлар йўқлиги қайд этилган.

Оқ уй матбуот котиби Карин Жан-Пьер эса тиббий кўрикдан сўнг Жо Байденда ҳеч қандай “янги касалликлар”ни аниқламаганини таъкидлади. 

“Президент ўзини яхши ҳис қилмоқда. Бу йилги тиббий кўрикда хавотирланиш учун янги сабаблар аниқланмади. У ҳеч қандай истисно ва имтиёзларсиз ўз вазифаларини бажаришга қодир”, дейилади хабарда.

Доктор ҳам Америка етакчисини “81 ёшли соғлом, фаол ва бақувват, Президент сифатидаги вазифаларини, жумладан, ҳукумат ижроия ҳокимияти раҳбари, давлат раҳбари ва бош қўмондонлик вазифаларини бажаришга қодир одам” деб атади.

Жо Байденнинг соғлиғи ҳақидаги маълумотлар ноябрь ойидаги президентлик сайловлари олдидан очиқланди, бироқ унинг соғлиғи ва ёши ҳақидаги мунозаралар давом этмоқда.

Масалан, 9-10 февраль кунлари ABC News/Ipsos томонидан ўтказилган сўровда респондентларнинг 86 фоизи 81 ёшли Байден иккинчи муддатга Президент бўлиш учун “жуда қари” деб ўйлашини айтди.

Эслатиб ўтамиз, олдинроқ Жо Байден Мичиган штатидаги праймеризда ғалаба қозонганди.

Улканбаева Райҳона