“Барронни фронтга юборинг”. Трамп ўғли атрофида сатирик кампания авж олди

АҚШ ва Исроилнинг Эронга қарши ҳаво зарбалари фонида интернетда Қўшма Штатлар Президенти Дональд Трампнинг кенжа ўғли Баррон Трампни армияга чақиришга қаратилган сатирик кампания кенг тарқалди. Бу ҳақда “Euronews” ёзди.

“South Park” мультсериали сценаристларидан бири Тоби Мортон томонидан ишга туширилган сайтда 19 ёшли Барронни урушга юбориш ғояси ҳазил ва танқидий руҳда илгари сурилган. Шу орқали #SendBarron хештеги ижтимоий тармоқларда оммалашиб кетган.

Кампания АҚШнинг Эронга қарши катта ҳарбий амалиётидан кейин пайдо бўлган. Ушбу зарбалар давомида камида олти нафар америкалик ҳарбий ҳалок бўлгани хабар қилинган. Айрим кузатувчилар Трампни қурбонлар ҳақида етарлича қайғурмаётганликда танқид қилмоқда. Уларга кўра, Президент бир тадбирда ҳалок бўлган ҳарбийлар ҳақида эмас, балки Оқ уйда қурилиши режалаштирилаётган янги зал ҳақида гапирган.

Сатирик сайтда Трампнинг “жасорати” ва “кучли генлари”га ишора қилиб, унинг ўғли ҳам мамлакатни ҳимоя қилишга тайёр экани ҳазил тарзида тилга олинган. Сайтда ҳатто “ёш шаҳзода”нинг ухлаб ётган суратлари ҳам жойлаштирилган бўлиб, матнда “хизмат – шараф, куч эса мерос” каби кинояли иборалар ишлатилган.

Интернет фойдаланувчилари бу ташаббусни кенг муҳокама қилмоқда. Айримлар Трамп оиласининг ҳарбий хизматга муносабатини ҳам эсга олган. Дональд Трамп Вьетнам уруши даврида тиббий сабаб — товон суягидаги муаммо баҳонаси билан армияга чақирувдан озод қилингани ҳақида маълумотлар борлиги айтилади.

Шу билан бирга, мутахассислар Баррон Трампнинг армияга чақирилиши амалда эҳтимоли пастлигини таъкидлайди. Унинг бўйи тахминан 205 сантиметр бўлиб, бу кўплаб АҚШ ҳарбий бўлинмаларида белгиланган максимал бўй меъёридан юқори ҳисобланади.