“Балогун эффекти”. Франция ҳам FIFA’га мурожаат қилмоқчи 

Франция футбол федерацияси 2026 йилги Жаҳон чемпионати 1/8 финалида Парагвайга қарши учрашувда ярим ҳимоячи Майкл Олисега кўрсатилган сариқ карточкани бекор қилиш бўйича FIFA’га расмий мурожаат йўллаш имкониятини кўриб чиқмоқда. Бу ҳақда “L’Équipe” нашри хабар берди.

Маълум қилинишича, Олиcега огоҳлантириш учрашувнинг қўшиб берилган вақтларида кўрсатилган.

Жаҳон чемпионати регламентига кўра, сариқ карточкалар фақат чорак финал босқичи якунланганидан кейин ҳисобдан чиқарилади. Шу боис, агар Олиcе Марокашга қарши чорак финал баҳсида яна бир сариқ карточка олса, у автоматик равишда ярим финални ўтказиб юборади.

Нашрнинг ёзишича, Франция футбол федерацияси ўз мурожаати учун асос сифатида FIFA’нинг яқинда АҚШ терма жамоаси ҳужумчиси Фоларин Балогунга нисбатан қабул қилган қарорини келтирмоқчи. Ўшанда FIFA Интизом қўмитаси футболчининг қизил карточкаси бўйича дисквалификациясини бир йиллик синов муддати билан тўхтатиб, унинг кейинги учрашувда иштирок этишига рухсат берган эди.