Баку AZAL самолётини уриб туширган ракетани аниқлади – “Reuters”

Қозоғистоннинг Ақтау шаҳрига яқин жойда қулаб тушган Озарбайжон ҳаво йўллари (AZAL) авиакомпаниясининг Embraer 190 самолёти Россиянинг “Панцирь-С” ҳаво мудофаа тизими ракетаси томонидан уриб туширилган. Бу ҳақда Озарбайжон ҳукуматидаги манбага таяниб, “Reuters” хабар берди.

“Озарбайжон томони самолётдан чиқариб олинган ва халқаро экспертиза орқали аниқланган “Панцирь-С” ракетасининг парчасига эга”, дейди нашр манбаси.

Қайд этиш жоиз, кеча, 4 февраль куни Қозоғистон Транспорт вазирлиги самолёт ҳалокати бўйича 53 бетлик ҳисоботни эълон қилган эди. Унда айтилишича, самолёт фюзеляжидаги “кўп сонли ва ўзгармас шикастланишлар” “ташқи нарсаларнинг кириб келишини” кўрсатади.

Бироқ ҳужжатда “Панцирь-С” ҳаво ҳужумидан мудофаа тизими ёки бирон бир ракета ҳақида сўз очилмаган.

Озарбайжон Рақамли ривожланиш ва транспорт вазирлиги “Reuters” агентлигига ҳисоботни изоҳлар экан, самолёт тўлиқ парвозга яроқли бўлгани, аммо “ташқи объектлар” таъсиридан шикастланганини маълум қилган.

“Фюзеляжнинг шикастланган жойларида топилган самолётга тегишли бўлмаган объектлар олиб ташланди, уларнинг фотосуратлари дастлабки ҳисобот матнида жамоатчиликка тақдим этилди. Топилган бегона нарсаларнинг нималигини аниқлаш мақсадида келгусида қўшимча экспертиза ўтказиш режалаштирилмоқда”, дейилади изоҳда.

Embraer 190 самолётининг қулаши

25 декабрь куни Azerbaijan Airlines авиакомпаниясининг Баку-Грозний йўналишидаги самолёти ҳалокатга учради. Самолётда 62 нафар йўловчи ва беш нафар экипаж аъзоси бўлган. Самолёт қулашида 38 киши ҳалок бўлди, 29 киши омон қолди. 

Дастлаб самолётнинг ҳалокатига қушлар галаси билан тўқнашиб кетгани сабаб бўлгани айтилган эди. Кейинроқ “Euronews” Озарбайжон ҳукуматидаги манбаларига таяниб, ушбу авиаҳалокат Россия томонидан учирилган ер-ҳаво синфидаги ракета туфайли содир бўлганини эълон қилди. Шунингдек, AZAL Embraer 190 самолёти ҳалокатининг дастлабки сабаби сифатида ташқи жисмоний ва техник таъсирларни кўрсатди.

Озарбайжоннинг Рақамли ривожланиш ва транспорт вазири Рашод Набиев ҳам самолёт ҳалокатига “ташқи аралашув” сабаб бўлган бўлиши мумкинлигини айтди. АҚШ ҳам лайнернинг қулашида Россиянинг ҳаво ҳужумидан мудофаа тизимларининг таъсирини таъкидламоқда.

Озарбайжон парламенти депутати Расим Мусабеков Россия томони Azerbaijan Airlines фуқаролик самолётини ҳаво ҳужумидан мудофаа ракетаси билан уриб туширгани учун узр сўраши кераклигини айтди. Кейинчалик Кремль матбуот котиби Дмитрий Песков Россия Президенти Владимир Путин  Озарбайжон етакчиси Илҳом Алиевдан 2 марта кечирим сўраганини маълум қилди.   

Чеченистон ҳукумати эса Рамзан Қодировнинг топшириғи билан Баку-Грозний йўналишидаги AZAL авиакомпаниясига тегишли самолёт ҳалокати оқибатида вафот этган ва жабрланганларнинг оилаларига молиявий ва бошқа ёрдам кўрсатишга тайёр эканини билдирди. Лекин Озарбайжон Президенти маъмурияти ҳеч қандай ёрдамга муҳтож эмаслигини ва бундай ёрдамни қабул қилмаслигини маълум қилди.