БАА энергия инқирози ортидан ОPEC’ни тарк этмоқда

Бирлашган Араб Амирликлари “мамлакатнинг миллий манфаатлари” юзасидан OPEC (The Organization of the Petroleum Exporting Countries) ва OPEC + ни тарк этишини эълон қилди. Бу ҳақда “Аl Jazeera” хабар берди.

Қарор расман 1 майдан кучга кириши маълум қилинди. Амирликнинг мазкур қарори АҚШнинг Эронга ҳужумлари ортидан келиб чиққан глобал нефть инқирози ортидан рўй бермоқда. Бугун, 29 апрель куни БАА Энергетика вазирлиги ушбу қарорни тасдиқлаб расмий баёнот билан чиқди.

“Биз ушбу қарорни БААнинг узоқ йиллик стратегик ва иқтисодий жиҳатдан барқарор ривожланишда давом этишини кўзлаб қабул қилдик. Ташкилотдаги фаолиятимиз давомида иттифоқдошларимиз манфаатлари учун катта ҳиссамизни қўшдик, аммо талофатли йўқотишларни ҳам бошдан кечирдик. Бундай кейинги сиёсий қарорларимизни мамлакатимизнинг миллий манфаатларига қаратиш вақти келди”, дейилади амирлик Энергетика вазирлигининг расмий баёнотида.

Шунингдек, мамлакат Энергетика вазири Суҳайл Муҳаммад ал-Мазруий “Reuters”га берган интервьюсида ОPЕC’нинг узоқ йиллик ҳамкори бўлган БААнинг ташкилотдан чиқиб кетиши глобал нефть бозорида йирик бўшлиқ ҳосил қилишини айтган. Бундан ташқари, у қарор синчковлик билан кўриб чиқилганидан сўнг қабул қилинганини ва мамлакат ушбу жараёнда ҳеч қайси давлат билан маслаҳатлашмаганини билдирган.

Эроннинг Ҳормуз бўғозини ёпиб қўйиши Форс кўрфазидан нефть импорт қиладиган давлатларда глобал энергия инқирозини келтириб чиқармоқда. Ҳормуз бўғозидан дунёдаги нефть ва табиий газнинг бешдан бир қисми ўтади.

Маълумот ўрнида, амирлик ОPЕC’га 1967 йилда Абу-Даби Амирлиги номи билан, 1971 йилда эса Бирлашган Араб Амирликлари эълон қилингандан сўнг ташкилотнинг расмий аъзолигига қабул қилинган.

Эслатиб ўтамиз, аввалроқ Бирлашган Араб Амирликлари АҚШга Ҳормуз бўғозини ҳарбий йўл билан очишда ёрдам беришга тайёргарлик кўраётгани ҳақида хабар берилган эди.

Ҳожиакбар Муҳаммаджонов