Авдеевка Россия назоратига ўтиши мумкин

Агар Конгресс зудлик билан чора кўрмаса, Авдеевка ва фронт чизиғидаги бошқа аҳоли пунклари Россия назорати остига тушиши мумкин. Бу ҳақда Оқ уй Миллий хавфсизлик кенгашининг стратегик алоқалар бўйича координатори Жон Кирби кеча, 15 февраль куни бўлиб ўтган матбуот брифингида сўз очди.

"Украинанинг қуруқликдаги кучларида артиллерия ўқ-дорилари камайиб бормоқда, Россия эса Украина позицияларига ҳужум қилиш учун янги аскарлар тўлқинини юбормоқда. Конгресс ҳали қонун лойиҳасини қабул қилмагани учун биз Украинага Россия ҳужумларини бартараф этиш учун зарур бўлган артиллерия ўқларини бера олмадик", дейди Кирби. 

Унинг таъкидлашича, Конгресснинг ҳаракатсизлигининг нархи "жуда юқори" бўлиб, у Украина аскарларининг елкасига тушади.

"Бизга Конгресс Миллий хавфсизлик бўйича қўшимча хавфсизлик тўғрисидаги қонунни кечиктирмасдан қабул қилиши керак. Агар республикачилар тез орада чора кўрмаса, ҳозир Авдеевкада содир бўлаётган воқеалар бу фронтнинг бошқа жойларида ҳам содир бўлиши мумкин", дейди Оқ уй вакили. 

Украина кеча, 15 февраль куни бир неча ой давом этган шиддатли жанглардан сўнг қўшинларини Авдеэвканинг айрим қисмларидан қулайроқ позицияларга олиб чиқаётганини билдирди.

Авдеевканинг қўлга киритилиши Россиянинг Донбасснинг икки минтақаси устидан тўлиқ назорат ўрнатиш мақсадидаги муҳим лаҳзадир.

"Авдеевкада бизнинг бўлинмаларимиз манёвр қилмоқда ва янада қулайроқ позицияларга чекинмоқда", дейди Украина Мудофаа кучларининг Бирлашган матбуот маркази вакили Дмитрий Лиховий. 

У Авдеевкага таъминот ва у ердан эвакуация қилиш қийинлигини қўшимча қилди. Шунингдек, Лиховий ҳарбийлар олдиндан тайёрланган “захира логистика артерияси”ни ишга туширганини айтди.

"Фронтдаги вазият – Авдеевка, умуман шарқда. Биз аскарларимиз имкон қадар кўпроқ украиналикларнинг ҳаётини сақлаб қолиш учун етарли бошқарув ва технологик имкониятларга эга бўлишини таъминлаш учун қўлимиздан келганини қиламиз”, деган Украина Президенти Владимир Зеленский тунги видеомурожаатида.

Украинанинг энг машҳур жанговар бўлинмаларидан бири, қарши ҳужумда қатнашган ва Бахмут учун курашган Учинчи ҳужум бригадаси Авдеевкага ўтказилди. Бўлинма вакиллари Авдеевкадаги вазият "жаҳаннам" ва "таҳдидли" эканлигини айтмоқда.

Бригада қўмондони ўринбосари Максим Жорин жанглар Бахмутдагига қараганда анча шиддатли кечганини, Авдеевкадаги Украина Қуролли кучлари сони ва қурол-яроғи бўйича руслардан кам эканини маълум қилди.

Россия қўшинлари октябрь ойидан буён шаҳар бўйлаб олдинга силжишга ҳаракат қилмоқда. Улар уни уч томондан ўраб олди ва у ердаги Украина қўшинлари учун чекланган таъминот йўлларини қолдирди.

Лиховойнинг сўзларига кўра, Россия Авдеевка фронтида 50 мингга яқин қўшин тўплаган ва шаҳардаги жангларда Россиянинг тактик ҳужум гуруҳлари иштирок этмоқда, улар ҳали ҳам кичик, аммо ўсиб бормоқда. Унинг таъкидлашича, уларга "зирҳли гуруҳлар" қўшилмоқда.