Арсен Венгер FIFA’нинг янги президенти бўлиши мумкин

FIFA’нинг амалдаги президенти Жанни Инфантинонинг рақиблари “Арсенал” клубининг собиқ бош мураббийи Арсен Венгерни ташкилотнинг бўлажак президентлик сайловларида номзод сифатида иштирок этишга кўндиришга ҳаракат қилмоқда. Бу ҳақда “The Times” нашри хабар берди.

Сайловлар 2027 йил март ойида Марокашда бўлиб ўтиши режалаштирилган. Номзодлар иштирок этиш учун ўз аризаларини жорий йилнинг 18 ноябрига қадар топширишлари мумкин.

Ҳозирда 76 ёшли Венгер FIFA’нинг глобал футболни ривожлантириш бўйича раҳбари сифатида фаолият юритмоқда. Шунингдек, FIFA президентлигига эҳтимолий номзодлардан бири сифатида кўрилаётган Шимолий, Марказий Америка ва Кариб ҳавзаси футбол конфедерацияси (КОНКАКАФ) раҳбари Виктор Монтальяни сайловларда қатнашишни режалаштирмаётгани айтилмоқда.

56 ёшли Жанни Инфантино 2016 йил февраль ойида бўлиб ўтган навбатдан ташқари конгрессда FIFA президенти этиб сайланган. Кейинчалик у икки марта рақибсиз қайта сайланган. Арсен Венгер 1996-2018 йилларда “Арсенал”ни бошқарган. Унинг раҳбарлигида Лондон клуби Англия чемпионлигини уч марта, Англия кубогини етти марта қўлга киритган. Шунингдек, жамоа Чемпионлар лигаси ва UEFA кубоги финалларида иштирок этган.

Маълумот учун, франциялик мутахассис фаолияти давомида Япониянинг “Нагоя Грампус”, Франциянинг “Нанси” ва “Монако” клубларида ҳам ишлаган. У “Монако” билан Франция чемпионлиги ва мамлакат кубогини қўлга киритган.