Арманистон ва Озарбайжон чегарада ҳарбий асирларни алмашди

Арманистон-Озарбайжон чегарасидаги Газах вилоятида асирга олинган ҳарбийлар алмашинуви бўлиб ўтди. Бу ҳақда Озарбайжон давлат агентлиги хабар берди. 

Озарбайжон икки нафар озарбайжонлик ҳарбий хизматчи эвазига 32 нафар ҳарбий хизматчини Арманистон томонига топширди.

“Алмашишдан олдин Қизил Хоч вакиллари маҳбусларнинг аҳволини текшириб, қониқарли эканини тасдиқлади. Айирбошлаш вақтида ҳеч қандай ҳодиса қайд этилмади. Айирбошлаш ўзаро ишонч чора-тадбирларини амалга ошириш доирасида амалга оширилди”, дейилади хабарда.

Арманистонга қайтарилган 32 аскар 2020 йил декабрь ойида Тоғли Қорабоғнинг Ҳадрут вилояти ва Арманистон-Озарбайжон чегарасининг турли участкаларида қўлга олинган.

Икки озарбайжон аскари – Ҳусайн Охундов ва Агшин Бабиров жорий йилнинг апрель ойидан бери асирликда.

Томонлар ўртасидаги аввалги алмашинув 7 декабрь куни бўлиб ўтганди. Кейин Озарбайжон ҳам икки озарбайжонлик ҳарбий хизматчи эвазига 32 нафар арман ҳарбийларини озод қилди. Томонлар муносабатларни тартибга солиш ва тинчлик шартномасини тузишга тайёр эканини эълон қилди ва ҳарбий асирларни алмашишни ишончни мустаҳкамлаш учун қадам деб аташди.