Ариана Гранде эълон қилинмаган қўшиқларини ўғирлаган хакерларни судга берди

Америкалик поп юлдуз Ариана Гранде эълон қилинмаган қўшиқлари, шахсий суратлари ва видеоларини ўғирлаб, интернетда сотганликда гумон қилинаётган хакерларга қарши судга мурожаат қилди. Бу ҳақда “The Guardian” хабар берди.

Маълум қилинишича, хонанда бугун, 28 июль куни Лос-Анжелес судига даъво аризаси киритган. Унда гумонланувчиларнинг шахси аниқланмагани сабабли улар John Doe (шахси номаълум шахс) сифатида кўрсатилган. Гранде суд жараёни орқали уларнинг шахсини аниқлаб, жавобгарликка тортишни мақсад қилган.

Даъво аризасига кўра, хакерлар хонанда билан ишлаган бир неча кишининг онлайн аккаунтларига ноқонуний кириш орқали 2023 йилнинг ўзида унинг 45 та ҳали эълон қилинмаган қўшиғини интернетга сиздирган.

Шунингдек, улардан бири ўзини фотограф сифатида таништириб, Гранде жамоаси ходимларидан бирини алдаб, хонанданинг шахсий суратларини қўлга киритган. Овоз ёзиш жараёнлари ва мусиқий клиплар суратга олиниши ортидаги фото ва видеолар ҳам ўғирланиб, dark-web орқали сотилгани айтилмоқда.

Даъво аризасида бу ҳолат Ариана Гранденинг шахсий ҳаёти ва ижодига жиддий зарар етказгани, махфий материалларнинг рухсатсиз тарқатилиши эса унинг шахсияти ҳамда мухлислари билан ўртасидаги алоқага тажовуз экани таъкидланган.

Маълумот учун, Ариана Гранде 1993 йил 26 июнда АҚШнинг Флорида штати, Бока-Ратон шаҳрида туғилган. У қўшиқчи ва актриса бўлиб, фаолияти давомида учта Грэмми мукофотини қўлга киритган ҳамда 20 марта ушбу мукофотга номзод бўлган. Шунингдек, Гранде актёрлик фаолиятини ҳам давом эттирмоқда.

Эслатиб ўтамиз, аввалроқ қўшиқчи ва актриса Ариана Гранде Оқ уйга Президент Дональд Трампнинг миграция сиёсати қўллаб-қувватланган видеоларда ўз қўшиқларидан фойдаланишни тақиқлаган эди.