Аргентинада Мессининг рақами кимга берилиши айтилди

Аргентиналик 39 ёшли футбол юлдузи Лионель Мессининг Аргентина терма жамоасидаги 10-рақамли либоси Николас Пасга берилиши мумкин. Бу ҳақда “ESPN Argentina” нашри хабар берди.  

Манбага кўра, агар терма жамоа бош мураббийи Лионель Скалони меҳнат шартномасини узайтирса ва терма жамоадаги фаолияти давом этса, Мессининг 10-рақамли либоси “Комо” ярим ҳимоячиси Николас Пасга берилиши мумкин.

Яқинда бўлиб ўтган Жаҳон чемпионатида 21 ёшли ярим ҳимоячи Аргентина терма жамоаси билан кумуш медални қўлга киритди. Пас гуруҳ босқичининг иккита учрашувида майдонга тушди, аммо гол ура олмади.

Николас Пас Аргентина терма жамоаси сафида жами 11 та ўйинда иштирок этиб, битта гол урган ва битта голли узатмани амалга оширган.

Маълумот учун, 39 ёшли Месси 2023 йилдан бери Шимолий Америка Олий футбол лигаси (MLS) вакили “Интер Майами”да тўп тепиб келмоқда. Европада аргентиналик футболчи Франциянинг ПСЖ ва Испаниянинг “Барселона” клубларида ўйнаган. “Барселона” билан у тўрт марта Чемпионлар лигаси, уч мартадан UEFA Суперкубоги ва Клублар ўртасидаги жаҳон чемпионатида ғолиб чиққан.

Ҳужумчи 2022 йилги жаҳон чемпиони, 2014 ва 2026 йилги Жаҳон чемпионатларининг кумуш медали соҳиби, 2008 йилги Олимпиада чемпиони ҳамда 2021 ва 2024 йиллардаги Копа Америка ғолиби ҳисобланади. Месси “Олтин тўп”ни энг кўп марта қўлга киритган футболчи – 8 карра соврин соҳиби.

Месси Аргентина терма жамоаси сафида 207 та учрашувда майдонга тушиб, 125 та гол урган. У ҳар икки кўрсаткич бўйича ҳам терма жамоа рекордчиси ҳисобланади. Ҳужумчи жаҳон чемпионатларида олти марта иштирок этган.

Эслатиб ўтамиз, аввалроқ Лионель Месси ўзининг Instagram саҳифасида Аргентина терма жамоасидаги фаолиятини якунлаганини расман маълум қилганди.