Аргентина футболчилари тақиқларга қарамай майдонда сиёсий мурожаат қилди (видео)

Аргентина терма жамоаси футболчилари 2026 йилги Жаҳон чемпионатининг ярим финалида Англияни 2:1 ҳисобида мағлуб этгач, майдонда Мальвина (Фолкленд) ороллари ҳақидаги баннерни намойиш қилди. Бу ҳақда “The Telegraph” хабар берди.

Учрашувдан сўнг аргентиналик футболчилар “Мальвина ороллари Аргентинага тегишли” деган ёзув туширилган баннерни очишди.

Фолкленд ороллари (Аргентинада Мальвина ороллари деб аталади) юзасидан сиёсий баҳс 1982 йилдан буён давом этиб келмоқда. Ўша йили Буюк Британия ва Аргентина архипелаг устидан қуролли можарога киришган. Уруш оқибатида 649 нафар аргентиналик ва 255 нафар британиялик ҳарбий ҳалок бўлган. Натижада ороллар устидан назорат Буюк Британия қўлида сақланиб қолган.

2013 йилда мазкур ҳудудда референдум ўтказилган бўлиб, унда овоз берганларнинг 99,8 фоизи Буюк Британия таркибида қолиш тарафдори бўлган. Бироқ Буэнос-Айрес ушбу референдум натижаларини тан олмайди.

Учрашув олдидан АҚШ Федерал қидирув бюроси (FBI), FIFA ҳамда маҳаллий полиция вакиллари қўшма йиғилиш ўтказиб, икки мамлакат ўртасидаги тарихий зиддият ва мухлислар ўртасида эҳтимолий тўқнашувлар хавфи сабабли баҳсни “энг юқори хавф” тоифасига киритган эди.

Энди Аргентина терма жамоаси жорий йилнинг 19 июль куни Жаҳон чемпионати финалида Испанияга қарши майдонга тушади.