Аргентина Атлантада камбэк қилди

Бугун, 7 июь куни Аргентина миллий терма жамоаси Жаҳон чемпионатининг 1/8 финал босқичида драматик ғалабага эришди. Атланта шаҳрида бўлиб ўтган баҳсда аргентиналиклар Миср терма жамоасини 3:2 ҳисобида мағлуб этиб, мусобақанинг кейинги босқичига йўл олди.

Учрашув Миср учун анча муваффақиятли бошланди. 15-дақиқада Яссер Иброҳим ҳисобни очиб, африкаликларга устунлик тақдим этди. Аргентина биринчи бўлим давомида ташаббусни қўлга олишга уринган бўлса-да, рақибнинг зич ҳимояси ва тезкор қарши ҳужумлари уларга жиддий қийинчилик туғдирди.

Иккинчи бўлимда ҳам Миср ўз имкониятидан унумли фойдаланди. 67-дақиқада Мустафо Зико гол уриб, ҳисобни 2:0 кўринишига келтирди. Аммо шундан кейин Аргентина босимни кескин оширди ва ўйин тақдирини қисқа вақт ичида ўзгартириб юборди.

79-дақиқада Мессининг узатмасидан кейин Кристиан Ромеро жамоасининг биринчи голига муаллифлик қилди. Орадан тўрт дақиқа ўтиб, 83-дақиқада Лионель Месси ўзи ҳисобни тенглаштирди. Асосий вақтга қўшиб берилган 90+3 дақиқада эса Энцо Фернандес ҳал қилувчи голни киритиб, Аргентинага иродали ғалаба келтирди.

Ўйинда киритилган голларни ушбу ҳавола орқали томоша қилишингиз мумкин.

Шу тариқа, Аргентина 0:2 ҳисобида ортда бораётганига қарамай, баҳсни ўз фойдасига ҳал қилди ва Жаҳон чемпионатида юришини давом эттирадиган бўлди. Миср эса катта устунликни сақлаб қола олмай, мусобақа билан хайрлашди.