Apple’га янги раҳбар тайинланди

Америкалик муҳандис Жон Тернус Apple компаниясига бош директор этиб тайинланди. У бу лавозимда 15 йил фаолият юритган Тим Кукнинг ўрнини эгаллади. Бу ҳақда “Associated Press” хабар берди.

Қайд этилишича, Apple’нинг бозор қиймати Тим Кук компанияга раҳбарлик қилган 15 йил давомида кескин ошган. iPhone’нинг машҳурлиги ҳисобига Apple қиймати 4,6 триллион долларгача етган.

Жон Тернус эса раҳбарликни сунъий интеллект соҳасида кескин рақобат кучайган даврда бошлади. Apple сўнгги йилларда ушбу йўналишда рақибларидан ортда қолмоқда. Компания сунъий интеллект асосидаги янги функцияларни жорий этишда қийинчиликларга дуч келган.

Янги бош директор олдида Apple’нинг сунъий интеллект соҳасидаги мавқеини мустаҳкамлаш, таъминот занжири билан боғлиқ муаммоларни ҳал қилиш ва компаниянинг АҚШ Президенти Дональд Трамп билан муносабатларини сақлаб қолиш каби вазифалар турибди.

Маълумотларга кўра, Тернус 2013 йилдан буён Apple’да аппарат муҳандислиги бўйича вице-президент лавозимида ишлаб келган. У компаниянинг Apple Watch, AirPods ва Apple Vision Pro каби маҳсулотларини ишлаб чиқишда иштирок этган.

Тим Кук эса бош директорлик лавозимини тарк этиб, Apple компаниясининг ижрочи раиси бўлган. У янги лавозимида компаниянинг муҳим ҳамкорлар, жумладан, Дональд Трамп билан муносабатларини сақлашга ёрдам бериши кутилмоқда.

Шунингдек, Жон Тернус келаси ҳафта Apple’нинг Калифорния штатидаги Купертинодаги бош қароргоҳида янги iPhone тақдимотида компания номидан чиқиш қилади.

Эслатиб ўтамиз, аввалроқ Apple M6 ва M5 Pro процессорларига асосланган янги Mac mini компьютерларини тақдим этган эди.