“Anorbank” раҳбари Францияда ўғирлаб кетилди

Жорий йилнинг 23 июнь куни Ўзбекистондаги “Anorbank” раҳбари 48 ёшли Қаҳрамонжон Олимов Францияда ўғирлаб кетилди. Бу ҳақда “Le Monde” хабар берди.

 

 

 

 

Посмотреть эту публикацию в Instagram

 

 

 

 

 

 

 

 

 

 

 

Публикация от QALAMPIR.UZ (@qalampir.uz)

Маълум қилинишича, Олимов Париж шаҳрида ўғирлаб кетилган ва Ницца шаҳри яқинидаги вилланинг ертўласида ушлаб турилган. Унинг озод қилиниши учун эса товон пули талаб қилинган. Пулнинг маълум қисми амалга оширилганидан сўнг, у қўйиб юборилган. 

Нашрнинг ёзишича, ўзбек банкири озод қилингач, дарҳол шифохонага мурожаат қилган. Тиббий текширувдан сўнг танасида кўплаб кўкаришлар билан шифохонага ётқизилган.

Қайд этилишича, Қаҳрамонжон Олимов 23 июнь куни Парижга бизнес учрашуви учун борган. Шунингдек, ташриф давомида нотариусдан реал мулк сотиб олиш, Франциядаги ўзбекистонликлар билан учрашиш ва Sofitel Arc-de-Triomphe меҳмонхонасида тўққиз кеча қолишни режалаштирган. 

Учрашувдан сўнг Олимовни кимдир кузата бошлаган. У Париж кўчаларида ушланган ва махфий равишда Ницца яқинларидаги вилланинг ертўласида сақланиб, унга нисбатан ҳақоратлар, жисмоний зўравонликлар қўлланилган. 

Орадан кўп вақт ўтмай гумондорларнинг бири қўлга олинган, унга “гуруҳ билан шахсни ўғирлаш” айби қўйилган. Қолганларни эса излаш ишлари давом этмоқда. 

QALAMPIR.UZ ҳолат бўйича изоҳ олиш учун банк билан боғланди. “Anorbank” расмийси шундай ҳодиса рўй берганини тасдиқлади ва Олимов озодликка чиқиш учун ўз шахсий пулларини ишлатгани, ҳодисанинг банкка омонот қўйган мижозларнинг пулига алоқаси йўқлиги билдирди.

Маълумот учун, Қаҳрамонжон Олимов Ўзбекистоннинг таниқли молиячиларидан бири. У 1977 йилда туғилган, 1999 йилда Андижон муҳандислик-иқтисодиёт институтини тамомлаган. Шунингдек, 2012 йилда Ўзбекистон Республикаси Президенти ҳузуридаги Давлат ва жамият қурилиши академияси қошидаги Бизнес мактабида таҳсил олиб, бизнес бошқаруви бўйича магистр даражасини қўлга киритган.

У Ўзбекистонда хусусий банк секторида фаолият юритувчи энг муҳим шахслар қаторига киради. Ҳозирда “Anorbank” акциядорлик жамиятининг асосий акционерларидан бири ва Кузатув кенгаши аъзоси ҳисобланади.