Амстердамда XIX асрга оид черков ёниб кетди (видео)

Янги йил кечасида Нидерландиянинг Амстердам шаҳрида Вонделкерк номли тарихий черков йирик ёнғин оқибатида деярли бутунлай вайрон бўлди. Бу ҳақда NH Nieuws хабар берди.

Нашрнинг ёзишича, ёнғин черковнинг юқори қисмида 1 январь куни маҳаллий вақт билан тахминан соат 01:00 да бошланган. Ёнғин сабаблари ҳозирча аниқланмаган. Бино деярли тўлиқ ёниб кетган, фақат деворлари сақланиб қолган. Дастлаб қутқарувчилар черков қулаб тушишидан хавотир билдирган, бироқ муҳандислар конструкция барқарорлигини тасдиқлаган.

Ёнғин сабабли черков жойлашган Амстердам ҳудудида хавфсизлик чоралари жорий этилган. Атрофдаги барча кўчалар ёпилган. Шарқ томонга тарқалган учқунлар ва тутун туфайли яқин атрофдаги бир неча ўнлаб уйлар аҳолиси эвакуация қилинган. Шунингдек, ўт ўчирувчиларнинг ишлаши учун тахминан 90 та уйда электр энергияси вақтинча ўчирилган. Эвакуация қилинган аҳоли яқин дўконлардан бирига жойлаштирилган.

Ўт ўчирувчилар бино катталиги ва кучли шамол туфайли жиддий қийинчиликларга дуч келган. Ёнғиннинг тез тарқалиши ва қулаш хавфи сабабли черков фақат ташқи томондан ўчирилган, сув эса қўшни Вонделпаркдан олинган. Ҳокимият аҳолига кучли тутун ҳақида огоҳлантириш юбориб, дераза ва эшикларни ёпишни тавсия қилган. Амстердам мэри Фемке Халсема ёнғинни “жуда кучли ва даҳшатли” деб атаган.

Маълумот учун, Вонделкерк номли неоготик черков 1872–1880 йилларда машҳур меъмор Пер Кейперс лойиҳаси асосида қурилган. У Амстердам Марказий вокзали ва Рейксмузей муаллифи ҳисобланади. Черков мамлакат адабиётининг “олтин асри” вакили бўлган шоир Йост ван ден Вондел номи билан аталган. 1970 йиллардан буён бино ибодат учун фойдаланилмаган, балки кўргазмалар, концертлар ва жамоат тадбирлари ўтказиладиган майдон вазифасини бажарган.

Эслатиб ўтамиз, аввалроқ Швейцариянинг Кран-Монтана шаҳрида (Вале кантони) Янги йил кечасида барда портлаш ва ёнғин содир бўлганди. Ҳодиса оқибатида бир неча киши ҳалок бўлган, ўнлаб одамлар жароҳат олган.