Алиев Қорабоғни тиклашда илк совғани Ўзбекистон берганини айтди (видео)

Озарбайжон Президенти Илҳом Алиев Тоғли Қорабоғни тиклаш учун илк совғани Ўзбекистон берганини айтди. Бу ҳақда у Хонкенди шаҳрида жорий йилнинг 19 июль куни ўтказилган Шуша халқаро медиа-форумида маълум қилди.

Форумда Ўзбекистон журналистика ва оммавий коммуникациялар университети ректори Шерзодхон Қудратхўжа томонидан берилган саволларга жавоб қайтарар экан, Алиев шундай дейди:

“Ўзбекистонлик биродарларимизнинг кўмаги биз учун ҳамиша қадрли бўлган. Маълумки, Қорабоғни тиклаш учун биринчи совға Ўзбекистон томонидан қилинган. Президент Шавкат Миромонович ташаббуси билан Фузулий шаҳрида ўзбек халқининг буюк фарзанди Мирзо Улуғбек номи билан аталган 960 ўринли мактаб қурилди. Биз буни жуда қадрлаймиз, бу Ўзбекистон Президентининг самимий биродарлик ишораси, Озарбайжонга ҳудудларни тиклашда кўрсатган ёрдами эди”.

Озарбайжон етакчисининг сўзларига кўра, у 2 кун олдин ҳам Фузулийга борган. Давлат раҳбари айни пайтда у ерда 500 дан ортиқ ўқувчи таҳсил олаётганини айтди.

“Мен бир неча кун олдин яна Фузулийда бўлдим, у ерда 500 дан ортиқ бола ўқийди. Собиқ қочқинларни Фузулийга қайтариш жараёни ҳали бошланғич босқичда эканига қарамай, у ерда анча бола таҳсил олмоқда”, дейди у.

Маълумот учун, Ўзбекистон етакчиси 2021 йилнинг 31 март куни бўлиб ўтган Туркий кенгашнинг норасмий саммитида Ўзбекистон Қорабоғ заминидаги ёдгорликлар, маданият ва маърифат масканларини қайта тиклашга ўз ҳиссасини қўшишга тайёр эканини таъкидлаган эди. Шундан сўнг, Ўзбекистон 30 йил деганда Арманистон ишғоли остидан Озарбайжонга ўтган Қорабоғда туҳфа сифатида мактаб қурадиган бўлди. 2023 йилнинг 23 август куни Ўзбекистон Президенти Шавкат Мирзиёев ва Озарбайжон раҳбари Илҳом Алиев Қорабоғдаги Мирзо Улуғбек мактабини очиб берди. Ушбу мактабда 40 та синфхона, 6 та лаборатория, 2 та информатика хонаси, 5 та фунционал ўқув хонаси, мажлислар ва спорт заллари, ошхона, кутубхона мавжуд. Футбол майдони, дам олиш ва тадбирлар ўтказиш учун жойлар, югуриш йўлаклари ташкил қилинган.

Мактаб очилишида Президент Шавкат Мирзиёев Фузулийда ҳаёт барқарор ҳолатга қайтаётганидан мамнунлигини билдирган, Илҳом Алиев раҳбарлигида Қорабоғни қайта тиклаш ва ривожлантириш, аҳолининг фаровон турмуши учун қулай шароитлар яратиш бўйича олиб борилаётган бунёдкорлик ишларини юксак баҳолаган.

Эслатиб ўтамиз, 2025 йилнинг 19 июль куни Хонкендида бўлиб ўтган учинчи Шуша халқаро медиа-форумида сўзлаган нутқида Президент Илҳом Алиев Озарбайжон 2024 йилнинг декабрида Қозоғистонда ҳалокатга учраган Озарбайжон ҳаво йўлларининг (AZAL) Embraer 190 самолёти ҳалокати билан боғлиқ ҳолда Россияга қарши халқаро судларга тақдим этиш учун ҳужжатларни тайёрлаётганини маълум қилганди. Шунингдек, Алиев Украина яхлитлигини тиклаш бўйича бир қатор тавсиялар бериб, Россиянинг Украинани босиб олишига ҳеч қачон рози бўлмасликка чақирди.