“Ал-Наср” мухлислари Роналдуни қўллаб-қувватлади

Кеча, 6 февраль куни “Ал-Наср” жамоаси мухлислари Саудия Арабистони Премьер-лигасининг 21-туридан ўрин олган “Ал-Иттиҳод”га қарши учрашув вақтида португалиялик ҳужумчи Криштиану Роналдуни қўллаб-қувватлаш мақсадида акция ўтказишди.

Учрашув Ар-Риёддаги “Ал-Аввал Парк” стадионида бўлиб ўтди ва мезбон жамоанинг 2:0 ҳисобидаги ғалабаси билан якунланди. Голларга Садио Мане (84-дақиқада, пенальти) ҳамда Анжело (90+6) муаллифлик қилди.

Ўйиннинг еттинчи дақиқасида трибунадаги мухлислар Роналдунинг исми ва унинг машҳур 7-рақами туширилган плакатларни кўтаришди. Шунингдек, улар бир неча дақиқа давомида беш карра “Олтин тўп” соҳиби голларни нишонлаш пайтида айтадиган машҳур “Си” шиорини биргаликда куйлашди.

Роналду мазкур учрашув қайдномасига киритилмади. У аввалроқ 20-тур доирасидаги “Ар-Риёд”га қарши ўйинни ҳам ўтказиб юборганди. Хабарларга кўра, португалиялик футболчи клуб раҳбариятидаги эҳтимолий ўзгаришлар борасида Саудия Арабистони Давлат инвестиция жамғармасидан аниқ кафолатлар йўқлиги сабаб кетма-кет иккинчи ўйинни ҳам ўтказиб юборишни режалаган.

Агар яқин ҳафталарда бундай кафолатлар берилмаса, у июнь ойида трансфер сўраши мумкинлиги айтилмоқда.

“Ар-Риёд”га қарши ўйиндан сўнг ОАВда ҳужумчи Карим Бенземанинг “Ал-Иттиҳод”дан “Ал-Ҳилол”га ўтиши ортидан Роналду ҳам клубни тарк этишни ўйлаётгани ҳақида хабарлар тарқалди. Кейинчалик француз футболчиси янги жамоаси сафида дебют учрашувида хет-трик қайд этди.

Маълумот учун, Криштиану Роналду жаҳон футболи тарихида энг кўп гол урган футболчи бўлиб, ҳисобида 961 та гол бор. Португалиялик юлдуз 2023 йилдан буён “Ал-Наср” сафида тўп суриб, 127 та ўйинда 111 та гол муаллифига айланган.