АҚШда жинсий жиноят содир этган ўзбекистонлик қўлга олинди

АҚШнинг Мэриленд штатида жинсий жинояти учун судланган ўзбекистонлик қўлга олинди. Бу ҳақда АҚШ Иммиграция ва божхона назорати хизмати маълум қилди. 

Аниқлик киритилишича, 65 ёшли И.Г. 2015 йил октябрь ойида АҚШга қонуний равишда кириб келган. Кейинчалик у кириш шартларини бузган. 2024 йил август ойида эркак тўртинчи даражали жиноят (жинсий жиноят) содир этганликда айбланиб, ҳибсга олинган. Ўша йилнинг декабрь ойида у айбдор деб топилиб, уч йиллик синов муддатига ҳукм қилинган.

Жорий йилнинг февраль ойи бошида у худди шундай жиноятни содир этганликда айбланиб, яна қўлга олинган.

“Бундай ҳибсга олиш ишларимиз кўчаларимизда битта йиртқич ва битта потенциал қурбон камайганини англатади. Бизнинг асосий мақсадимиз жамоат хавфсизлиги ва Мэриленд аҳолисини ҳимоя қилишдир. Биз жамоаларимизга хавф солаётганларни жавобгарликка тортилиши учун тинимсиз ишлашда давом этамиз”, дейилади хабарда.

Эслатиб ўтамиз, аввалроқ Америка Қўшма Штатлари Хавфсизлик департаментининг Тергов бошқармаси (HSI) 3 февралга қадар АҚШ бўйсунувидаги Пуэрто-Рикода федерал иммиграция қонунларини бузганликда айблаб, 100 кишини, жумладан Ўзбекистон фуқароларини ҳам ҳибсга олганди.

Моҳимбегим Маъруфалиева