АҚШда яна қуролли ҳужум: 1 киши ҳалок бўлди, 11 киши яраланди

АҚШнинг Шимолий Каролина штати ғарбидаги Катавба округидаги хусусий уйда зиёфат пайтида отишма содир бўлди, оқибатда бир киши ҳалок бўлди, яна 11 киши жароҳат олди. Бу ҳақда “Associated Press” хабар берди.

Туман шерифи маълумотларига кўра, ҳодиса 1 июнь куни маҳаллий вақт билан тахминан 00:45 да содир бўлган. Дастлабки маълумотларга кўра, 80 га яқин ўқ узилган. Воқеа жойида бўлган одамлар ваҳима ичида қочишга ёки яширинишга ҳаракат қилишган.

Ҳужум қурбони 58 ёшли Шон Патрик Ҳуд эди. Жароҳатланган 11 кишидан 7 нафари шифохонада даволанишни давом эттирмоқда, улардан бирининг аҳволи оғир. Вилоят шерифи ўринбосари Аарон Турк брифингда отишма одатда тинч ҳудудда, Хикори шаҳридан 11 километр жанубда содир бўлганини айтди. Унинг сўзларига кўра, фожиадан икки соат олдин полицияга хонадон қўшнисидан зиёфатдан келаётган шовқин ҳақида ариза келиб тушган.

Воқеа жойига полиция ходимлари етиб келган ва аралашган, бироқ Туркнинг сўзларига кўра, ҳозирча шикоят ва кейинги ҳужум ўртасида тўғридан тўғри алоқа ўрнатилмаган. Ҳозирда тергов давом этмоқда. Ҳозирча ҳеч ким ҳибсга олинмаган. Ҳуқуқ-тартибот идоралари зиёфат меҳмонлари ва маҳаллий аҳолини терговга ёрдам бериши мумкин бўлган ҳар қандай маълумотни тақдим этишга чақирмоқда.

Жиноят содир бўлган жой тахминан икки гектар майдонни эгаллагани айтилмоқда. Тергов ҳаракатлари уй ичида ҳам, унга туташ ҳудудда ҳам олиб борилмоқда. Расмийлар ҳужумда бир неча отишма иштирок этгани эҳтимолини истисно этмаяпти.

Эслатиб ўтамиз, 16 май куни АҚШнинг Лас-Вегас шаҳридаги спорт залда рўй берган отишмада 2 киши ҳалок бўлган, яна тўрт киши жароҳат олганди. Ҳуқуқ-тартибот идоралари ходимлари воқеа жойига етиб келганида, қуролланган эркак спорт залининг эшиги олдида турган. У бинодан югуриб чиқиб кетган, бироқ полиция унга қарата ўқ узган ва гумонланувчини қўлга олган.