АҚШда Украинадаги уруш бўйича рус талқини устунлик қилмоқда – Зеленский

АҚШ сиёсий раҳбарияти Украинадаги уруш воқеаларининг русча талқинига қулоқ тутмоқда. Бу ҳақда Украина Президенти Владимир Зеленский кеча, 13 апрель куни эълон қилинган Американинг CBS телеканалига берган интервюьсида айтиб ўтди.

“Менимча, афсуски, АҚШда рус талқини устунлик қилади. Қандай қилиб бизнинг қурбонларимиз ва азобларимиз гувоҳи бўласиз, руслар нима қилаётганини тушунасиз ва шу билан бирга улар босқинчилар эмаслигига, бу урушни улар бошламаганига ишонасизми? Бу Россиянинг ахборот сиёсатининг Америкага, АҚШ сиёсатига ва америкалик сиёсатчиларга катта таъсиридан далолат беради. Президент Трамп кучли давлатнинг кучли президенти сифатида Украина томонида бўлиши керак. Менимча, Американинг бетараф бўлишни исташи нотўғри”, деди Украина Президенти

Зеленский АҚШ Президенти Дональд Трампга Украигага келишни таклиф қилганини тасдиқлади.

“Келинг ва одамларни, тинч аҳолини, аскарлар, шифохоналар, черковлар, ўлган ёки яраланган болаларни кўринг”, деди у.

Украина Президенти АҚШ журналистлари билан биргаликда яқинда Россия ракета зарбаси оқибатида 20 киши, жумладан, тўққиз бола ҳалок бўлган Кривой Рог шаҳридаги болалар ўйингоҳига ташриф буюрди. Суҳбатнинг ўзи шаҳар мактабларидан биридаги бомба панасида бўлиб ўтди, у ерда дарслар учун синф хонаси ташкил этилган.

Зеленскийнинг сўзларига кўра, Кривой Рогга ҳужум “Россияга ишона олмаслигимизни англатади”.

“Бу биз Россия билан музокараларга ишона олмаслигимизни англатади. Халқимиз энг юқори товонни тўламоқда. Нарх юқорироқ бўлиши мумкин эмас. Биз бор пулимизни бердик - молиявий жиҳатдан бор нарсамиз. Лекин энг муҳими, биз халқимизнинг ҳаётини бердик”, дейди у.

Зеленскийнинг ишончи комилки, Россия Президенти Владимир Путин нафақат Украинани, балки бошқа давлатларни ҳам эгаллаб олмоқчи.

“Қатъий турмасак, у давом этади. Бу шунчаки бўш тахмин эмас, таҳдид ҳақиқат. Путиннинг асосий мақсади – Россия империясини жонлантириш ва ҳозир НАТО ҳимоясида бўлган ҳудудларни қайтариб олиш. Буларнинг барчасини инобатга олган ҳолда, бу жаҳон урушига айланиб кетиши мумкинлигига ишонаман”, дейди Президент Зеленский.

Эслатиб ўтамиз, кеча, 13 апрель куни эрталаб Россия ҳарбийлари Суми шаҳрига баллистик ракета билан ҳужум уюштирганди. Украина Фавқулодда вазиятлар давлат хизмати маълумотларига кўра, ўша куни маҳаллий вақт билан соат 21:00 га келиб 34 қурбон, жумладан, икки бола қайд этилган. 117 киши, жумладан, 15 бола тан жароҳати олди. Ҳужум йил бошидан бери энг кўп ҳалокатли бўлди. АҚШ Миллий хавфсизлик кенгашининг расмий вакили Брайан Хьюз Суми шаҳрига қуролли кучлар томонидан берилган ракета зарбаси Украинадаги урушда тинчлик музокаралари зарурлигини “кучли эслатиб туриши”ни айтди.  АҚШ Давлат котиби Марко Рубио ҳам худди шундай фикр билдирди.