Оқ уй Россиянинг Сумига қилган ракета зарбасига муносабат билдирди

Кеча, 13 апрель куни эрталаб Украинанинг Суми шаҳрига қуролли кучлар томонидан берилган ракета зарбаси Украинадаги урушда тинчлик музокаралари зарурлигини “кучли эслатиб туради”. Бу ҳақда ўша куни кечқурун АҚШ Миллий хавфсизлик кенгашининг расмий вакили Брайан Хьюз баёнот берди.

“Сумига қилинган ракета ҳужуми Президент Дональд Трампнинг бу даҳшатли урушга барҳам беришга бўлган уринишлари нима учун ҳал қилувчи паллага тўғри келгани ҳақида аниқ ва кучли эслатма бўлди”, дея унинг сўзларини келтиради AFP.

Аввалроқ АҚШ Давлат котиби Марко Рубио ҳам худди шундай фикрда гапирган эди.

“Бу Президент Трамп ва унинг маъмурияти нега бу урушни тугатиш ва мустаҳкам тинчликка эришиш учун кўп вақт ва куч сарфлаётгани ҳақида эслатма”, деди у.

Ўз навбатида, Оқ уй раҳбари Дональд Трампнинг Украина бўйича махсус вакили Кит Келлогг ўзининг Х саҳифасида “Россия қўшинларининг Palm Sunday куни Сумидаги фуқаролик объектларига ҳужуми барча одоб-ахлоқ чегараларини кесиб ўтди” деб ёзди.

Собиқ ҳарбий сифатида у мақсадли зарбалар нима эканини тушуниши ва улар нотўғрилигини, шунинг учун ҳам Президент Трамп бу урушни тугатиш учун қаттиқ ҳаракат қилаётганини қўшимча қилган.

Трампнинг ўзи Россиянинг Сумига ракета зарбасини изоҳлар экан, буни “даҳшатли воқеа” деб атади.

Россиянинг Сумига ракета зарбаси

north_east

Келлогг Украинани Ғарб ва Россия ўртасида бўлиб олишни таклиф қилди

Жорий йилнинг 13 апрель куни эрталаб Россия ҳарбийлари Суми шаҳрига баллистик ракета билан ҳужум уюштирди. Украина Фавқулодда вазиятлар давлат хизмати маълумотларига кўра, ўша куни маҳаллий вақт билан соат 21:00 га келиб 34 қурбон, жумладан, икки бола қайд этилган. 117 киши, жумладан, 15 бола тан жароҳати олди. Ҳужум йил бошидан бери энг кўп ҳалокатли бўлди.

Ўша куни кечқурун Украина Президенти Владимир Зеленский Telegram’да Россиянинг Сумига берган зарбаси оқибатида яраланган 68 киши тиббий муассасаларда бўлгани, улардан 8 нафарининг аҳволи оғир эканини маълум қилган эди.

“Университетдан ташқари, бешта кўп қаватли уй, кафе ва дўконлар, туман суди ўққа тутилиши туфайли зарар кўрди. Ҳаммаси бўлиб россияликлар ўз зарбалари билан 20 та бинога зарар етказди”, деган давлат раҳбари.

Эслатиб ўтамиз, аввалроқ Россия қўшинлари Украинанинг Суми шаҳри марказига ракеталар билан зарба бериши оқибатида 30 дан ортиқ одам ҳалок бўлгани, 80 дан ортиқ киши жароҳат олгани ҳақида хабар берилганди.