АҚШда Трамп сурати билан 250 долларлик купюра чиқариш таклиф қилинди

Жанубий Каролинадан сайланган республикачи конгрессмен Жо Уилсон АҚШ Президенти Дональд Трамп портрети туширилган 250 доллар номиналдаги купюра чиқаришни таклиф қилди. Бу ҳақда “Axios” хабар берди.

“Байденфляция иқтисодиётни вайрон қилди ва америкалик оилаларни кўпроқ нақд пул билан юришга мажбур этди”, деб изоҳлаган конгрессмен ўз ташаббусини.

Уилсон Трамп портретининг айнан шу купюрада акс эттирилишига сабаб сифатида “энг қиммат банкнота – энг қадрли президентга” тамойилини илгари сурган.

Бунгача айрим конгрессменлар Дональд Трамп туғилган кунини миллий байрам деб эълон қилиш ва унга учинчи марта президентликка номзодини қўйиш имконини беришни таклиф қилган эди.

Бироқ конгрессмен Уилсоннинг таклифи ноқонуний ҳисобланади. 1866 йилда АҚШ Конгресси қабул қилган қонунга кўра, тирик шахсларнинг суратларини купюралар ва тангаларга жойлаштириш тақиқланган. Аммо ҳозирда Трамп тарафдорлари Конгресснинг иккала палатасида ҳам кўпчиликни ташкил этади, бу эса назарий жиҳатдан ушбу қоида бекор қилиниши мумкинлигини англатади.

Маълумот учун, ҳозирда АҚШда амалдаги энг йирик номиналдаги купюра 100 доллар ҳисобланади. Илгари мамлакатда 10 ва 100 минг долларгача бўлган банкноталар ҳам чиқарилган. Улар ҳозир амалда мавжуд эмас, лекин банклараро транзакциялар ёки коллекцион мақсадларда сақланиб қолган.

Эслатиб ўтамиз, аввалроқ АҚШнинг Флорида штатидан республикачилар вакили Анна Паулина Луна Президент Дональд Трамп юзини Рашмор тоғига қўшиш бўйича қонун лойиҳасини тақдим этган эди. Агар Конгресс ушбу қонунни маъқулласа, Трамп юзини тошга ўйиб тушириш вазифаси Ички ишлар вазирлиги зиммасига юклатилади.