АҚШ Зеленскийдан Қозоғистон танкерларига ҳужумни тўхтатишни талаб қилди – FT

АҚШ вице-президенти Жей Ди Вэнс Қозоғистон нефтини ташувчи танкерларга қилинган ҳужумлардан норози ва бу масалада Украина Президенти Владимир Зеленскийга мурожаат қилган. Бу ҳақда “Financial Times” хабар берди.

Нашрнинг ёзишича, Жей Ди Вэнс Украинани Новороссийскдан Қозоғистон нефтини олиб чиқаётган танкерларга зарба беришни тўхтатишга чақирган. Манбаларнинг сўзларига кўра, Украина Қора денгиздаги муҳим портдан фойдаланаётган нефть танкерларига дронлар орқали берилаётган шиддатли зарбалар кампаниясини тўхтатган. Бу АҚШ вице-президенти Жей Ди Вэнснинг сўровидан сўнг амалга оширилган.

“Вашингтон Украинанинг Қозоғистондан қувур орқали Россиянинг Новороссийск порстидаги Каспий қувур консорциуми (КҚК) терминалига етказилаётган хом нефтни ташувчи танкерларга зарба бериб, нефть бозорларини янада беқарорлаштириши ва Америка компанияларига зарар етказишидан хавотирда эди.

Вэнс Президент Владимир Зеленскийдан 31 июль кунги телефон мулоқоти чоғида ҳужумларни тўхтатишни сўраган”, дейди манбалар.

Расмий шахслар ва “Financial Times” томонидан очиқ манбалар асосида ўтказилган таҳлилга кўра, ўшандан бери Украина Каспий қувур консорциуми терминали яқинидаги танкерларга зарба бермаган.

Шунингдек, манбаларнинг айтишича, томонлар ўртасида Украина КҚК инфратузилмасига ёки Россияга тегишли бўлмаган кемаларга, агар ушбу кемалар Украина санкциялари остида бўлмаса ва Россия нефти ёки бошқа Россия юкларини ташимаётган бўлса, зарба бермаслиги ҳақида келишувга эришилган.

“Биз америкалик ҳамкорларимизга жуда диққат билан қулоқ соламиз. КҚК АҚШ ва Қозоғистон ҳукуматлари билан муҳокамаларда мунтазам иштирок этиб келган”, дейди Украина юқори лавозимли мулозими.

АҚШ вакили маъмурият Украинани Қора денгизда Россияга тегишли бўлмаган кемаларни ҳамда КҚК инфратузилмасини ўққа тутишни тўхтатиш зарурлиги ҳақида огоҳлантирганини тасдиқлаган.

“Маъмурият КҚКни Европа бозорларига Қозоғистонга тегишли энергия ресурсларини етказиб беришнинг ва Россия энергия манбаларига муқобил бўлган ҳаёт-мамот аҳамиятига эга канали сифатида кўради”, дейди мулозим.

Эслатиб ўтамиз, жорий йилнинг 30 июль куни Каспий қувур консорциуми матбуот хизмати КҚК денгиз терминали акваториясидаги танкерга берилган зарбани “террористик” деб атаб, баёнот берган эди.

Маршалл ороллари байроғи остидаги “Niffos Sifnos” танкери жабрлангани хабар қилинган эди. Юк жўнатувчи “Тенгизшевройл” МЧЖ (“Шеврон” компанияси, Қозоғистон) ҳисобланади. Танкер сузувчи чиқариш қурилмасида нефть ортиш жараёнида бўлган. Кейинчалик юз берган воқеага Қозоғистон Энергетика вазирлиги изоҳ берди. Шунингдек, Энергетика вазирлиги КҚК томонидан ёқилғи қабул қилиш вақтинча чеклангани сабабли Қозоғистон нефти янги йўналишлар бўйлаб қайта йўналтирилганини маълум қилди.