АҚШ Яқин Шарққа эсминец ва қирувчи самолётлар юборади 

АҚШ Мудофаа вазири Ллойд Остин Яқин Шарқ минтақасига қўшимча ракеталарга қарши мудофаа эсминецлари, қирувчи отрядлар ва танкер самолётлари, шунингдек, АҚШ Ҳарбий-ҳаво кучларининг бир нечта узоқ масофали зарба берувчи B-52 бомбардимончи самолётларини юборишни буюрди. Бу ҳақда кеча, 1 ноябрь куни Пентагон матбуот котиби Патрик Райдер баёнот берди.

Унинг сўзларига кўра, ушбу чора минтақадаги АҚШ кучлари ва фуқароларини ҳимоя қилиш, Исроилни ҳимоя қилиш ҳамда тийиш ва дипломатия йўли билан вазиятни юмшатиш билан боғлиқ ҳолда кўрилмоқда.

“USS Abraham Lincoln авиаташувчиси зарба бериш гуруҳи жўнаб кетишга тайёргарлик кўраётганда, кучлар яқин ойларда етиб кела бошлайди”, дея қўшимча қилди Райдер.

Пентагоннинг аниқлик киритишича, мазкур ўтказиш Исроилда Terminal High Altitude Area Defense (THAAD) ракетага қарши мудофаа тизимини жойлаштириш тўғрисидаги қарорни, шунингдек, Амфибия қўниш гуруҳи/Денгиз экспедицияси бўлинмасининг (ARG/MEU) Шарқий Ўртаер денгизида доимий мавжудлигини ҳисобга олган ҳолда амалга оширилди.

“Ҳаракатлар АҚШнинг глобал мудофаа позициясининг мослашувчан хусусиятини ва миллий хавфсизликка ўзгарувчан таҳдидларни бартараф этиш учун қисқа вақт ичида бутун дунё бўйлаб кучларни жойлаштириш қобилиятини намойиш этади”, дея таъкидлади Райдер.

Остиннинг таъкидлашича, агар Эрон, унинг шериклари ёки ишончли вакиллари америкаликлар ёки АҚШнинг минтақадаги манфаатларига ҳужум қилиш учун фурсатдан фойдаланса, Вашингтон “ўз халқини ҳимоя қилиш учун барча зарур чораларни кўради”.

Август ойи ўрталарида Вашингтон минтақага қанотли ракета билан жиҳозланган USS Georgia (SSGN 729) ядровий сувости кемасини жўнатди. Остин, шунингдек, АҚШ Марказий қўмондонлиги масъулияти ҳудудига F-35C қирувчи самолётлари билан USS Abraham Lincoln авиаташувчисини жойлаштиришни тезлаштиришни буюрди.