AQSH Yaqin Sharqqa esminets va qiruvchi samolyotlar yuboradi 

AQSH Mudofaa vaziri Lloyd Ostin Yaqin Sharq mintaqasiga qo‘shimcha raketalarga qarshi mudofaa esminetslari, qiruvchi otryadlar va tanker samolyotlari, shuningdek, AQSH Harbiy-havo kuchlarining bir nechta uzoq masofali zarba beruvchi B-52 bombardimonchi samolyotlarini yuborishni buyurdi. Bu haqda kecha, 1 noyabr kuni Pentagon matbuot kotibi Patrik Rayder bayonot berdi.

Uning so‘zlariga ko‘ra, ushbu chora mintaqadagi AQSH kuchlari va fuqarolarini himoya qilish, Isroilni himoya qilish hamda tiyish va diplomatiya yo‘li bilan vaziyatni yumshatish bilan bog‘liq holda ko‘rilmoqda.

“USS Abraham Lincoln aviatashuvchisi zarba berish guruhi jo‘nab ketishga tayyorgarlik ko‘rayotganda, kuchlar yaqin oylarda yetib kela boshlaydi”, deya qo‘shimcha qildi Rayder.

Pentagonning aniqlik kiritishicha, mazkur o‘tkazish Isroilda Terminal High Altitude Area Defense (THAAD) raketaga qarshi mudofaa tizimini joylashtirish to‘g‘risidagi qarorni, shuningdek, Amfibiya qo‘nish guruhi/Dengiz ekspeditsiyasi bo‘linmasining (ARG/MEU) Sharqiy O‘rtayer dengizida doimiy mavjudligini hisobga olgan holda amalga oshirildi.

“Harakatlar AQSHning global mudofaa pozitsiyasining moslashuvchan xususiyatini va milliy xavfsizlikka o‘zgaruvchan tahdidlarni bartaraf etish uchun qisqa vaqt ichida butun dunyo bo‘ylab kuchlarni joylashtirish qobiliyatini namoyish etadi”, deya ta’kidladi Rayder.

Ostinning ta’kidlashicha, agar Eron, uning sheriklari yoki ishonchli vakillari amerikaliklar yoki AQSHning mintaqadagi manfaatlariga hujum qilish uchun fursatdan foydalansa, Vashington “o‘z xalqini himoya qilish uchun barcha zarur choralarni ko‘radi”.

Avgust oyi o‘rtalarida Vashington mintaqaga qanotli raketa bilan jihozlangan USS Georgia (SSGN 729) yadroviy suvosti kemasini jo‘natdi. Ostin, shuningdek, AQSH Markaziy qo‘mondonligi mas’uliyati hududiga F-35C qiruvchi samolyotlari bilan USS Abraham Lincoln aviatashuvchisini joylashtirishni tezlashtirishni buyurdi.