АҚШ Венесуэла учун уч босқичли режа ишлаб чиқди

АҚШ Давлат котиби Марко Рубио Венесуэла бўйича уч босқичдан иборат режа ишлаб чиқилганини маълум қилди. Ушбу режа барқарорлаштириш, тиклаш ва ўтиш даврини ўз ичига олади. Бу ҳақда Рубио кеча, 7 январ куни журналистлар билан ўтгазган суҳбатида маълум қилди.

Рубионинг айтишича, АҚШ аввало барқарорлаштириш босқичидан бошлайди, чунки вазиятнинг тартибсизлик ва беқарорликка тушиб кетишини истамайди. 

Давлат котиби нефть бўйича келишувни барқарорлаштириш босқичининг бир қисми сифатида баҳолаган. Унинг таъкидлашича, АҚШ маъмурияти яқин вақт ичида Венесуэла нефтининг миллионлаб баррелини сотиш имкониятига эга бўлишни ва бу савдодан тушадиган, АҚШ назоратидаги даромадларни Венесуэла халқига фойда келтирадиган тарзда тақсимлашни режалаштирмоқда.

“Биз аллақачон эълон қилинган ушбу янги келишув доирасида ижобий силжишларни кўряпмиз ва келгусида яна янги келишувлар ҳам бўлади”, деган АҚШ Давлат котиби. 

Рубионинг қўшимча қилишича, режанинг иккинчи босқичи Венесуэла иқтисодиётини тиклашни назарда тутади. Бу босқичда ғарбий ва бошқа хорижий компанияларга мамлакат бозорига адолатли кириш имконини беришни режалаштирмоқда.

Шу билан бирга, Трамп маъмурияти Венесуэлада миллий ярашув жараёнини бошлашни хоҳламоқда. Бу орқали мухолифат кучлари амнистия олиши, қамоқдан озод этилиши ёки мамлакатга қайтиб, фуқаролик жамиятини қайта тиклашда иштирок этиши кўзда тутилган.

Учинчи босқич “ўтиш даври” бўлади. 

“Охир-оқибат, ўз мамлакатини ўзгартириш венесуэлаликларнинг қўлида қолади. Мен буни сенаторларга батафсил тушунтирдим. Яқин кунларда қўшимча тафсилотлар бўлади, аммо биз жараён ижобий йўналишда кетаётганига ишонамиз”, дея қўшимча қилган Марко Рубио. 

Эслатиб ўтамиз, аввалроқ Венесуэла АҚШ томонидан мамлакатга ҳужум уюштирилган ва Президент Николас Мадуро ўғирлаб кетилган пайтда ҳалок бўлган ҳарбийлар учун бир ҳафталик мотам эълон қилганди.