Венесуэлада 7 кунлик мотам эълон қилинди

Венесуэла АҚШ томонидан мамлакатга ҳужум уюштирилган ва Президент Николас Мадуро ўғирлаб кетилган пайтда ҳалок бўлган ҳарбийлар учун бир ҳафталик мотам эълон қилди. Бу ҳақда “Reuters” нашри хабар берди.  

Қайд этилишича, Венесуэла муваққат президенти Делси Родригес кеча, 6 январь куни дам олиш кунлари АҚШ томонидан амалга оширилган операция чоғида ҳалок бўлган ҳарбий хизматчилар муносабати билан етти кунлик миллий мотам эълон қилган. Маълумот учун, ушбу операция АҚШ томонидан Президент Николас Мадуро ва унинг рафиқасини қўлга олиш мақсадида ўтказилганди. 

Жанубий Америка давлати расмийларига кўра, ҳужум оқибатида тахминан 20 нафар венесуэлалик офицер ҳалок бўлган. Шунингдек, Куба ҳукумати 4 январь куни Венесуэлада хизмат олиб бораётган 32 нафар кубалик ҳарбий ва полиция ходими ҳам ҳалок бўлганини маълум қилиб, мамлакатда икки кунлик мотам эълон қилган. 

Эслатиб ўтамиз, аввалроқ Венесуэла мухолифати раҳбари Мария Корина Мачадо муваққат президент Делси Родригесни қийноқлар ва таъқиблар, коррупция ҳамда наркотрафикнинг асосий ташкилотчиси деб атаб, унинг халқаро инвесторлар учун ишончли шахс эмаслигини таъкидлаган эди.